Zgjerimi i Frontit të Bashkuar Opozitar me PDIU është konkretizuar me një marrëveshje mes Kryetarit të PD Lulzim Basha dhe Kryetarit të PDIU, Shpëtim Idrizi.
Mësohet se PD dhe PDIU janë angazhuar së bashku për një qeverisje të çliruar nga krimi.
Marrëveshja mes dy partive përmban 6 pika, ku mbizotëron vullneti për të larguar qeverinë që sipas tyre bashkëpunon me krimin, për të krijuar kushtet për zgjedhje të lira e të ndershme dhe më pas për qeverisje në interes të qytetarëve.
Marrëveshja
Koordinimi i aktivitetit politik me qëllim realizimin e programit të përbashkët si më poshtë vijon:
– Rikthimin e normalitetit politik e institucional në vend, krijimin e kushteve për ndarjen e politikës nga krimi si një plagë që po rrënon çdo standart demokracie në vend. Përpjekjet tona të përbashkëta do fokusohen në kthimin e normalitetit në jetën politike dhe ekonomike të vendit si dhe në bërjen funksionale të institucioneve të shtetit dhe të drejtësisë që sot janë të paralizuara, duke siguruar moskapjen dhe mosnënshtrimin e tyre nga politika e lidhur me krimin.
– Krijimin e kushteve për zgjedhje të lira, të drejta e të ndershme, ku të respektohet barazia e votës e të sigurohet numërimi i saj. Së bashku angazhohemi për rikthimin e vendit në hullinë kushtetuese ku qeveria do të dalë nga vota e lirë e shqiptarëve dhe jo nga skemat mafioze dhe lidhja me krimin, që ka deformuar vullnetin e shqiptarëve.
– PD dhe PDIU angazhohen për zhvillimin e zgjedhjeve të përgjithshme dhe vendore me qëllim rikthimin urgjent të normalitetit në vend dhe ndarjen e sistemit politik nga fenomeni i blerjes së votës, mosnumërimit apo keqnumërimit të saj, nga krimi dhe trafiqet.
– PD dhe PDIU bien dakord që në përputhje me Koventën Europiane Për të Drejtat e Njeriut, Rezolutën e Kuvendit të Shqipërisë për Çëshjen Çame, të angazhohen për zgjidhjen e çëshjes së shqiptarëve të Çamërisë në dimensionet e saj të kujtesës historike, nderimit dhe respektimit të viktimave, garantimit të lëvizjes së lirë të shtetasve shqiptarë të lindur në Çamëri si dhe mbështetjes për zgjidhjen diplomatike dhe juridike të çështjeve pronësore.
– PD dhe PDIU do të punojnë së bashku për të sjellë fuqizimin ekonomik të Shqipërisë nëpërmjet një strategjie zhvillimi të drejtë e orientuar drejt prodhimit, lirisë së sipërmarrjes, konkurrencës dhe mundësive për të gjithë.
– PD dhe PDIU angazhohen të punojnë për jetësimin e parimeve dhe instrumentave politikë dhe kushtetues për t’i dhënë vendit një mirëqeverisje afër qytetarit, të përkushtuar për zgjidhjen e problemeve të papunësisë, varfërisë dhe mundësive për një jetë më të mirë, për zhvillimin e demokracisë, nëpërmjet vendosjes së qeverisë në shërbim të qytetarëve dhe inetersit publik, nëpërmjet rritjes së transparencës dhe llogaridhënies së institucioneve shtetërore ndaj qytetarëve, luftës pa kompromis kundër korrupsionit dhe krimit të organizuar, dhe përmes ndarjes, balancimit, kontrollit demokratik dhe decentralizimit të pushtetit e rritjes së pjesmarrjes direkte dhe kontrollit të qytetarëve në qeverisje.
Shpëtim Idrizi
Kryetar i PDIU
