Prokurorët e gjyqtarët që do të përzgjidhen për të qenë pjesë e Strukturës së Posaçme Antikorrupsion (SPAK) do të jenë të kontrolluar në çdo aspekt të jetës së tyre për dhjetë vite. Nën kontroll do të jenë edhe krushqitë deri në Shkallën e Dytë për dhjetë vitet e fundit. Përveç komunikimeve në telefon apo llogarive bankare, sipas një dokumenti të siguruar nga “Panorama”, prokurorëve do t’u kërkohen të dhëna edhe për “krushqitë” deri në brezin e dytë.
Dokumenti që publikohet ditën e sotme është pjesë e projektligjit në formën e një formulari, që do t’u jepet për plotësim prokurorëve e gjyqtarëve të përzgjedhur të konkurrojnë për të qenë pjesë e zyrës së SPAKut. Te pjesa nr.6 e formularit që duhet të plotësojnë prokurorët kandidatë për zyrën e SPAKut, me titull “të dhëna për sigurinë”, prokurorëve u kërkohet të renditin emrat dhe detajet në pyetjen e pikës B: “A keni dijeni se një nga anëtarët e familjes suaj është përfshirë në veprimtari që lidhen me krimin e organizuar?”. Në pjesën shpjeguese në lidhje me këtë pyetje thuhet se informacioni duhet të jepet për dhjetë vitet e fundit dhe më tej sqarohet se: Me termin “familjar” do të kuptohet bashkëshortja/bashkëshorti i tij, i afërti deri në Shkallë të Katërt ose krushqi deri në Shkallë të Dytë, personi i lidhur me detyrime birësimi ose që bashkëjeton në mënyrë të përhershme me njërën nga palët.
Një tjetër pyetje që u është bërë kandidatëve për te SPAKu është: A keni pasur kontakte të papërshtatshme në formën e një telefonate, telekomunikim, takime, aktiviteti, vakti ose raste të tjera, me një ose më shumë persona të përfshirë në krimin e organizuar, të cilat nuk janë në pajtim me ushtrimin e detyrës?”. Në shpjegimin e përgjigjes së kësaj pyetjeje duket edhe një term tjetër problematik, që bën fjalë për “persona të akuzuar publikisht” dhe jo për personat e dënuar. Më konkretisht, në shpjegimin e përgjigjes që duhet dhënë, theksohet: Rendisni më poshtë takime, marrëdhënie ose kontakte të papërshtatshme me persona, të cilët në dijeninë tuaj kanë qenë ose janë të arrestuar, të dënuar, apo të akuzuar publikisht për përfshirje në krimin e organizuar në ushtrimin e detyrës suaj, të cilat nuk janë në pajtim me ushtrimin e detyrës?”.
