U zhduk pa gjurmë i plagosuri i përplasjes së djeshme me armë zjarri mes disa të rinjve ndodhi pasditen e djeshme në Tiranë. Ngjarja ndodhi rreth orës 16:00 në Rrugën e Kavajës, në zonën e ish-Parkut të Autobusëve. Ndërkohë që sot mësohet se ai është identifikuar si shtetasi Nelgert Pata, 34-vjeç.
Policia u njoftua për një të shtënë pistolete nga dëshmitarët e shumtë që kishin parë fillimisht përplasjen fizike mes të rinjve. Në vendngjarje shkuan menjëherë shërbimet e Komisariatit nr.2 e më pas edhe oficerë të Krimeve të Rënda. Burimet thanë se të gjithë personat e përfshirë në konflikt, madje edhe vetë personi që dyshohet se mund të jetë i plagosur, ishin larguar me shpejtësi nga vendi i ngjarjes.
Përveç një vrime plumbi në xhamin e një lokali dhe disa pikave gjaku në trotuar, Policia nuk gjeti asnjë gjurmë tjetër të personave të dyshuar. Madje mësohet se në vendngjarje nuk është gjetur asnjë gëzhojë, gjë që sipas Policisë tregon se autorët mund të kenë përdorur ndonjë pistoletë me mulli.
Pak minuta pas ngjarjes u arrit të identifikohen dhe të ndalohen dy shtetas nga Kosova, të dyshuar si autorë të ngjarjes. Burimet thanë se u shoqëruan shtetasit Flamur Hoti, 26 vjeç dhe Anton Azizi, 31 vjeç.
Por të dy këta persona kanë mohuar autorësinë e ngjarjes, duke refuzuar të japin shpjegime të mëtejshme, me pretendimin se nuk janë të përfshirë në asnjë konflikt.
FILMIMI I NGJARJES
Në vendin e ngjarjes Policia e Tiranës ka sekuestruar kamerat e sigurisë së një lokali, pranë të cilit ndodhi përplasja mes të rinjve. Burimet thanë se kamera ka filmuar gjithçka dhe nëpërmjet saj është bërë edhe identifikimi i dy kosovarëve që u ndaluan, edhe pse ata nuk pranojnë të flasin.
Në video duket se janë 4 ose 5 persona që sillen rrotull pallatit ku ndodhi ngjarja dhe më pas sulmojnë një person tjetër, i cili dyshohet të jetë i plagosuri. Burimet thanë se nuk është shumë i qartë motivi i ngjarjes, por nga mënyra se si ndodh përplasja dhe veprimet që kryejnë autorët, dyshohet se ngjarja mund të ketë ndodhur për çështje droge dhe prishje pazaresh.
Fillimisht duken autorët që presin momentin sa të shkojë aty i dëmtuari. Më pas, kur ai shkon aty, e sulmojnë, fillimisht me grushte e më pas njëri qëllon me pistoletë në drejtim të tij. Burimet thanë se nga pamjet e sekuestruara rezulton që i dëmtuari, është plagosur në vesh, por jo nga plumbi.
Dyshohet të jetë plagosur nga ciflat e xhamit, pasi ndodhej pranë lokalit që u godit. Megjithatë ky person ende nuk është gjetur nga Policia, që fillimisht ka verifikuar të gjitha spitalet, ato shtetërore dhe private, për të mësuar nëse kishte shkuar për mjekim në ndonjërin prej tyre.
Por ka rezultuar që ai nuk ka marrë mjekim në asnjë vend. Nga ana tjetër forcat e rendit kanë krehur të gjithë zonën përreth vendngjarjes, për të gjetur armën e krimit, por as ajo nuk është gjetur./panorama/a.k
