Zbardhet axhenda e kryeministrit Rama për vizitën në Nju Jork
Kryeministri Edi Rama do të vizitojë Shtetet e Bashkuara të Amerikës javën e ardhshme. Sipas burimeve nga Kryeministria, kreu i qeverisë pritet të mbajë disa fjalime për tema të ndryshme si ekstremizmi, zhvillimi i qëndrueshëm, barazia gjinore etj.
Zyra e shtypit e Kryeministrisë bën të ditur se më 24 shtator Rama do të marrë pjesë në “World Leadership Forum”, në Nju Jork, aktivitet i organizuar nga Shoqata për Politikë të Jashtme (Foreign Policy Association). E themeluar në vitin 1918, kjo shoqatë shërben si një katalizator për zhvillimin e njohjes dhe sigurimit të informacioneve dhe opinioneve për çështjet globale.
Një ditë më pas, kreu i qeverisë shqiptare do të marrë pjesë në Asamblenë e Përgjithshme të OKB-së, e cila këtë vit do të jetë e përqendruar në çështjet e zhvillimit të qëndrueshëm. Çdo fundshtatori, Organizata e Kombeve të Bashkuara mbledh Asamblenë e saj të Përgjithshme. Në sesionin e 70-të do të marrin pjesë udhëheqës nga të gjitha shtetet anëtare dhe aty do të flitet kryesisht mbi shqetësimet aktuale botërore, me theks te siguria dhe terrorizmi.
Në datat 26-29 shtator, kreu i qeverisë shqiptare pritet të marrë pjesë në aktivitetin “Impakti i së ardhmes” që do të organizohet në Nju Jork nga “Fondacioni Klinton”. Ai do të jetë mes 1000 emrave të suksesshëm ndërkombëtarisht që vijnë nga bota e biznesit, politikës apo shoqërisë civile, të cilët do të mblidhen së bashku në këtë ngjarje. “Impakti i së ardhmes” tashmë është kthyer në traditë gjatë dhjetëveçarit të fundit, ku udhëheqës të ndryshëm diskutojnë mbi mënyrën se si do të zgjidhin disa nga sfidat globale. Organizatore e këtij takimi është familja Klinton. Të gjithë pjesëmarrësit do të nxjerrin në pah pikat ku duhet punuar më shumë, në mënyrë që të sjellin progres në botën ku ne sot jetojmë. Disa nga sfidat që pritet të diskutohen janë ndryshimi i klimës, barazia gjinore, shëndetësia në rang global dhe nxitja e njerëzve për të bërë më shumë bamirësi. Pjesë e aktivitetit do të jetë edhe Presidentja e Kosovës, Atifete Jahjaga. Deri më sot, takime të këtij lloji kanë marrë më shumë se 3200 angazhime, të cilat kanë përmirësuar jetën e më shumë se 430 milionë njerëzve në 180 vende të botës. Edhe këtë herë priten mënyra inovative për të hartuar zgjidhje sa më konkrete dhe efektive.
Redaksia Java News/ f.g
