Këtë javë u mbajt seanca gjyqësore ndaj dy mjekëve të maternitetit “Koço Gliozheni”, në Tiranë, të cilët akuzohen për mjekim të pakujdesshëm ndaj Dorjana Hakës. Ndryshe nga seanca e parë, kjo e ditës së djeshme kaloi pa incidente.
Organi i akuzaës mundi që të lexojë në seancën e dytë gjyqësore, kërkesën për gjykim ndaj mjekut obstetër–gjinekolog P.R. dhe anestezistes, E.B..
Prokurori rindërtoi të gjithë ngjarjen që prej momentin kur e ndjera Dorjana Haka, bashkëshortja e portierit të Kombëtares, Alban Hoxha, ka mbërritur në maternitet për të sjellë në jetë fëmijën e parë, e deri kur ka ndërruar jetë.
Zëri i akuzës, kërkoi nga gjykata edhe pyetjen e 20 dëshmitarëve, ku binin në sy emri i drejtoreshës së maternitetit “Koço Gliozheni”, Rubena Moisiu si dhe mjekut Mentor Petrela.
Drejtoresha Moisiu është thirrur dëshmitare edhe nga avokatët mbrojtës të dy mjekëve nën akuzë.
Aktakuza
Prokuroria theksoi se hetimi për vdekjen e Dorjana Hakës nisi në 4 dhjetor 2014, pas kallëzimit të bërë nga ana e babait të saj, Enver Haka.
I ati u ka thënë hetuesve se e bija, e cila priste të sillte në jetë fëmijën e parë, që në fakt lindi një djalë që gëzon shëndet të plotë, nuk kishte shfaqur asnjë shqetësim shëndetësor, as para dhe as në momentin kur u dërgua në maternitet.
Në dosjen e prokurorisë thuhet se në maternitet Dorjana është shoqëruar nga bashkëshorti, Alban Hoxha, prindërit dhe vjehrra e saj. Para se të shtrohej në maternitet – theksohet në dosje – vjehrra e Dorjanës kishte biseduar me një miken e saj, konkretisht anestezisten E.B. të maternitetit “Koço Gliozheni”, të cilat kishin planifikuar datën dhe orën e shtrimit për lindje.
Në dosje, theksohet gjithashtu se Dorjana Haka ka mbërritur në maternitet në orën 09:00 të datës 4 nëntor 2014. Fillimisht gjithçka dukej sikur shkonte më së miri, por pas lindjes tek Dorjana Haka janë vërejtur probleme shëndetësore dhe disa ditë më vonë e reja ka ndërruar jetë.
Pakujdesia në mjekim
Duke argumentuar akuzën e mjekimit të pakujdesshëm nga ana e mjekëve P.R. dhe E.B., prokuroria thekson në dosje se kontrolli pas operacionit në rastin e Dorjana Hakës ka qenë i pamjaftueshëm.
“Rekomandimet e mjekëve të shënuara në kartelën klinike të pacientes, lidhur me kryerjen e analizave, janë realizuar me shumë vonesë”, thuhet në dosje.
Mandej theksohet se duke iu referuar të dhënave të përshkruara në kartelat klinike të repartit Obstretik-Gjinekologjik të spitalit “Koço Gliozheni” dhe Klinikës së Neurologjisë në Spitalin “Nënë Tereza”, rezulton se shkak i vdekjes së Dorjana Hakës me mundësitë më të mëdha ka qenë arresti kardiak.
Në përfundim, referuar aktekspertimit të kryer nga ekspertë të mjekësisë ligjore, prokuroria thekson se mjekët e pandehur nuk kanë marrë masat e nevojshme para dhe pas operatore për të parandaluar përkeqësimin e gjendjes shëndetësore të shtetases Dorjana Haka, e cila më pas ka gjetur vdekjen./GSH
