Një burim pranë qeverisë shqiptare konfirmon atë që është mësuar paraprakisht nga mediat greke gjatë ditës së sotme, se pati një bisedë jo të shkurtër telefonike mes kryeministrit Rama dhe atij grek Cipras.
Në fokus të kësaj bisede kanë qenë temperaturat e rritura të kohëve të fundit dhe praktikisht janë prekur të gjitha çështjet që kanë trazuar ujërat mes Tiranës dhe Athinës.
Gjithashtu është folur edhe për shqetësimet konkrete lidhur me mbarëvajtjen e ndërveprimit mes dy shteteve të funksion të respektimit maksimal të të drejtave qytetarëve shqiptarë apo grekë nga të dy palët respektive.
Mësohet se dy kryeministrat kanë qenë sidoqoftë dakord mbi nevojën për të intensifikuar përpjekjet sa më të sinqerta në kuadër të një mekanizmi dypalësh të instaluar nën drejtimin e të dy ministrave të jashtëm për të adresuar me dialog dhe me efektivitet çështjet e lartpërmendura, duke u mbështetur në forcimin e besimit larg retorikës që e dëmton besimi reciprok e mbi të gjitha duke respektuar nevojën e dy popujve tanë për thellimin e miqësisë tradicionale.
Sipas burimit, biseda e dy shefave të qeverive ka qenë mjaft e hapur dhe jo e lehtë, por me një frymë mjaft konstruktive./Tema/a.m.
