Janë zbardhur detaje nga mbledhja e kryeministrit Edi Rama me ministrat dhe drejtuesit politikë të Partisë Socialiste, e zhvilluar në Vilën e Kuqe në Sauk.
Në fokus të takimit ka qenë organizimi i punës në terren dhe forcimi i komunikimit të strukturave politike dhe qeverisëse me qytetarët.
Sipas informacioneve të bëra publike, gjatë mbledhjes secili prej drejtuesve politikë ka prezantuar një kalendar për të ashtuquajturën “Ora e Pranisë Besnike”, në kuadër të së cilës do të zhvillohen takime të drejtpërdrejta me qytetarët në zona të ndryshme.
Një pjesë e takimeve pritet të nisë që këtë fundjavë. Në terren do të angazhohen deputetë dhe zëvendësministra, të cilët do të takojnë qytetarët dhe do të mbledhin shqetësimet, problematikat dhe kërkesat e tyre.
Kjo nismë synon të rrisë praninë e përfaqësuesve politikë dhe qeveritarë në terren, duke krijuar një komunikim më të drejtpërdrejtë me qytetarët dhe duke identifikuar problematikat që kërkojnë ndërhyrje institucionale.
Ndryshime në kabinetin qeveritar
Mbledhja e sotme është shoqëruar edhe me një zhvillim në kabinetin qeveritar.
Ministrja e Shëndetësisë dhe Mirëqenies Sociale, Evis Sala, ka dhënë dorëheqjen nga detyra pas rreth një viti në krye të ministrisë.
Sala ka deklaruar se largimi lidhet me angazhime të reja ndërkombëtare në fushat e saj të ekspertizës, konkretisht në onkologji, inteligjencë artificiale dhe inovacion.
Në një mesazh pas largimit, ajo ka theksuar se angazhimi i saj për Shqipërinë nuk lidhet me një post dhe se do të vijojë të kontribuojë përmes eksperiencës dhe rrjetit të saj profesional.
Takimi vijon nesër
Mbledhja e zhvilluar sot në Vilën e Kuqe i paraprin një tjetër takimi të planifikuar për nesër në Pallatin e Brigadave.
Në këtë takim pritet të marrin pjesë Grupi Parlamentar i Partisë Socialiste dhe kabineti qeveritar.
Takimet vijnë në një periudhë ku mazhoranca pritet të intensifikojë organizimin politik dhe praninë e përfaqësuesve të saj në terren, me fokus te komunikimi me qytetarët dhe ndjekja e problematikave të evidentuara në komunitete.
