Producentja Zana Çela do të jetë drejtuesja e re e Teatrit Kombëtar të Operas dhe Baletit. Kryeministri Edi Rama ka emëruar sot Zana Çelën në krye të TKOB, pas dorëheqjes së Ilir Kernit nga ky post.
Komisioni i Ministrisë së Kulturës përzgjodhi Zana Celën dhe Josif Gjipalin për të vijuar garën për drejtimin e këtij institucioni të rëndësishëm të jetës kulturore në vend. Kandidaturat iu dërguan më pas Këshillit të Ministrave, që vendosi sot për emërimin e Zana Çelës në krye të TKOB.
Zana Çela, rikthehet në drejtimin e Teatrit të Operas dhe Baletit, post që e ka mbajtur në vitet 2000-2003.
PLATFORMA E ZANA ÇELES: TEATËR KOZMOPOLIT, EKSELENCË DHE DONATORË
“Që në fill të platformës kam nënvizuar faktin që për hartimin e saj kam bërë analizën e TKOB sot, problemet, specifikat e tij. Këto më kanë shërbyer si guidë. Risqet më të mëdha të teatrove janë: rënia e interesit të shoqërisë, mungesa e subvencioneve që kërkojnë menaxhim.
Si të dalim nga kjo gjendje për të siguruar të ardhmen: të rrisim audiencat që të kapin të gjitha kategoritë, sidomos të rinjtë, pra një teatër kozmopolit, duke u mbështetur në traditën e TKOBAP e në bashkëpunim me rrjetin europian të operës që siguron rritjen e nivelit.
Angazhimi kryesor është ta kthejmë TKOB në një institucion të ekselencës, edukimit dhe inovacionit. Kam caktuar 6 fusha: ekselencë në program dhe zbatimin e kalendarëve artistikë, edukimin e publikut, thithjen e publikut, marketing dhe promocion. Menaxhim më i mirë i burimeve financiare që ka teatri, duke identifikuar burime të reja, donatorë, sponsorë; ripozicionim të vendeve të punës sipas aftësive dhe repertor më i gjerë: me të gjitha epokat, nga barokja te tendencat e reja”.
BW/d.i.
