Emisioni “Le lene” në rrjetin televiziv italian Mediaset transmetoi këtë të hënë një tjetër reportazh investigativ për ish-shefin e antidrogës së Fierit, Dritan Zagani, i cili ndodhet në Zvicër, në kërkim të azilit për familjen tij.
Investigimi i sjellë nga gazetari Luixhi Pelaca rikujton se si ra në pranga ish-oficeri i antidrogës së policisë shqiptare, lidhjet e tij me agjentët italianë por dhe rolin e përfaqësueses së INTERPOL-it italian, Anna Pogi, në Shqipëri.
Dritan Zagani u arrestua pas një operacioni policor, siç rrëfen ai, ku u sekuestruan 110 kilogramë marijuanë, me akuzën “shpërdorim detyre”, pasi nuk njoftoi eprorët e tij. Por Zagani i rrëfen gazetarit italian se s’kishte pse të njoftonte, pasi eprorët e tij ishin vetë në krye të operacionit, përcjell “News24”.
Më pas tregohet dhe historia e avionit që u rrëzua në Divjakë nga piloti italian Riformato. Gazetari kontaktoi me banorë të zonës, të cilët i treguan se kanë parë të ulen edhe avionë të tjerë në pistë tjetër dhe jo vetëm në plazh. Në këtë pjesë të reportazhit hyn dhe emri i italianit Alesandro Giuliani, që sipas gazetarit nuk ishte thjesht një financier, por një agjent sekret i policisë italiane. Ishte ky personi që komunikonte me policë, por infiltrohej edhe me trafikantë droge, duke krijuar kushte për ndërhyrje më vonë të kolegëve të tij.
Pikërisht me këtë person komunikonte oficer Zagani. “Bashkëpunoja çdo ditë me të, që kur Giuliani ishte me mision në Shqipëri. Flisnim për drogën, trafikantët, vendet ku fshihej droga, ku shkonte dhe kush e merrte”, tha ai.
Sipas ish-oficerit, tashmë të gjitha telefonatat trajtohen sikur ai ka bërë trafik droge me Giulianin. Kjo e çoi policinë shqiptare të pyeste përfaqësuesen e INTERPOL Italisë, Anna Pogi. Kjo e fundit përmes një shkrese vinte në dukje zyrtarisht autoritetet shqiptare se Alesandro Giuliani nuk kishte asnjë rol si në Shqipëri ashtu edhe në Itali. Ishte pikërisht kjo shkresë që çoi në burg Dritan Zaganin.
Po çfarë e detyroi Anna Pogin të gënjente? Sipas Zaganit, Pogi duhet t’u kthente autoriteteve shqiptare një nder që ata i kishin bërë me birësimin e dy fëmijëve në Shqipëri. Sipas gazetarit të “Le Iene”, Anna Pogi nuk birësonte dot fëmijë në Itali pasi ishte grua e pamartuar. Kurse në Shqipëri, asaj iu dha nënshtetësia shqiptare dhe iu mundësua birësimi i dy fëmijëve.
Dritan Zagani e mbyll intervistën se me të siguruar azil për familjen e tij, do rikthehet në Shqipëri, për ta çuar këtë luftë deri në fund.
SHEKULLI
