Lideri i LSDM-së, Zoran Zaev ka vizituar sot Lagjen e Trimave në Kumanovë, pas ngjarjeve të ditëve të fundit.
Zaev ka parë nga afër rrënimet dhe situatën e tmerruar në Lagjen e Trimave në Kumanovë, ku dy ditëve të fundit ka pasur përleshje të ashpra. Kreu i opozitarëve theksoi në fjalën e tij faktin që asnjë prej liderëve politikë shqiptarë të Maqedonisë nuk ka vizituar ende Kumanovën.
Ky është një qëndrim korrekt i kreut opozitar Zaev, duke parë që BDI e Ali Ahmetit është kujtuar sot për të reaguar në lidhje me Kumanovën dhe mbi të gjitha për të sqaruar se në këtë aksion kjo parti nuk ka pasur gisht.
Ndërkohë “është shpallur në kërkim” lideri tjetër shqiptar Menduh Thaçi i cili prej ditësh as nuk ka reaguar dhe as nuk ka dhënë “asnjë shenjë jete”.
“Askush nga liderët shqiptarë, as Ali Ahmeti dhe as Menduh Thaçi nuk ka ardhur në Kumanovë. Por më e rëndësishme është të ndihmohen familjet pa strehë dhe për nevojat momentale që kanë. Do të vlerësohen dëmet materiale, edhe pse dëmet shpirtërore nuk mund të dëmshpërblehen”, deklaroi Zaev.
Ai informoi se në mbledhjen e mbrëmshme të Këshillit të Sigurimit Kombëtar ka kërkuar sqarime se përse ka ndodhur ky skenarë, pse autoritetet shtetërore kanë pasur informacion para 8 muajve për ato që thuan për grup të armatosur dhe nuk kanë reaguar.
http://www.dailymotion.com/video/x2ptj3h_zaevi-po-takohet-me-qytetaret-e-kumanoves_webcam?start=2
