Lideri i LSDM-së Zoran Zaev ka deklaruar se do ti shfrytëzojë të gjitha mjetet demokratike dhe do të vazhdojë me publikimin e dëshmive të cilat kanë të bëjnë me kryeministrin Nikolla Gruevski dhe bashkëpunëtorët e tij më të ngushtë.
Sipas Zaevit, projekti për të vërtetën e Maqedonisë do të vazhdojë dhe më së shumti të intensifikohet gjatë stinës së vjeshtës ka deklaruar kryetari i kësaj partie në një deklaratë për magazinën “Kapital”.
Këto komente Zaev i bëri pas deklaratës së djeshme se bisedimet me Gruevskin kanë dështuar dhe se marrëveshja e 2 qershorit është e vdekur. Zaev mendon se vizita e zyrtares së lartë nga Uashingtoni që do ti bëhet Maqedonisë më 13 korrik të këtij viti do të jetë e dobishme për të ndihmuar zgjidhjen e krizës politike.
Ndihmëssekretarja shtetërore Viktorija Nuland do të qëndrojë në Shkup pas katër ditësh e cila do të takohet me kreun më të lartë shtetëror në vend. “Komuniteti ndërkombëtar është i angazhuar miqësisht ndaj Maqedonisë. Çdo propozim i mirë do të ishte i mirëseardhur. Nëse ka propozim të mirë sigurisht se do të merret parasysh”, ka thënë lideri i LSDM-së Zoran Zaev, raporton Telegrafi.
Ndryshe, vazhdojnë përplasjet mes pushtetit dhe opozitës pas publikimit të aferës së përgjimeve në Maqedoni.
