Jam e lumtur që presidenti Trump dhe sekretari Pompeo ma besuan mua këtë detyrë.
Kështu u shpreh ambasadorja Yuri Kim në fjalimin e saj të parë drejtuar popullit shqiptar.
Kim tha se pak miq e kanë përqafuar miqësinë me SHBA-të sesa Shqipëria, shkruan JavaNews.al
“Jam e nderuar që jam këtu, para ambasadës themelet e së cilës u vendosën në vitin 1929. Miqësia jonë nuk u ndërtua në një ditë. 100 vite më parë, Presidentin Wilson ngriti zërin për Shqipërinë, kur askush nuk e bëri. Ai e përdori fuqinë e tij për ta frenuar copëtimin e Shqipërisë” – tha ambasadorja e re e SHBA.
Ajo u shpreh se punët e vështira mund të bëhen të lehta vetëm kur ke miq dhe aleatë në krahë.
“SHBA është e vendosur që Shqipëria të bëhet një vend më i fortë. Ne mbështesim aspiratën e popullit tuaj për një sistem ku secili duhet të respektojë të njëjtat rregulla” – tha Kim.
Ambasadorja tha se mezi pret të punojë me politikanët shqiptarë që duan largimin e korrupsionit dhe krimit.
“Jam besimplote se teksa drejtësia hedh rrënjë në Shqipëri, më shumë investitorë do të vijnë këtu. Mos kini asnjë dyshim për vlerësimin që SHBA ka për ju” – tha Kim.
Ajo pati edhe një mesazh në gjuhën shqipe: Ne jemi ende me ju, krah për krah!
/JavaNews/a.r
