Tre liderët e opozitës, Visar Ymeri, Ramush Haradinaj dhe Fatmir Limaj kanë thirrur një konferencë për media pas zhvillimeve të sotme brenda dhe jashtë Kuvendit të Kosovës. I pari i VV-së, Visar Ymeri, tha se Hashim Thaçi nuk mund të jetë president i Republikës së Kosovës, pasi sipas tij, ai u zgjodh me anë të ndërhyrjeve të dhunshme policore ndaj deputetëve të opozitës dhe qytetarëve protestues. Po ashtu, Ymeri tha se kjo u bë përmes një terrori psikologjik edhe ndaj deputetëve të koalicionit dhe të tjerëve në Kuvend. Këtë, Ymeri e mbështeti në faktin se Thaçi në raundin e parë të votimeve mori vetëm 50 vota.
Sipas Ymerit, Thaçi president u zgjodh me bekimin e Vuçiçit përmes Listës Srpska. “Sot Kosova ka në krye të shtetit një njeri, i cili nuk do ishte aty pa përkrahjen e Serbisë”, tha ai, duke shtuar se “ky fillim i kapjes së shtetit nuk do të kalojë”. “Qyetatarët me protesta do të ngadhënjejnë kundër kësaj klike.” Ndërsa kryetari i AAK-së, Ramush Haradinaj, tha se Qeveria Thaçi-Mustafa është e dështuar. “Është konstatim i të gjithëve se regjimi Mustafa Thaçi ka dështuar në politikën e jashtme dhe në anëtarësimin në UNESCO”, tha ai. Më tej ai tha se shkelësit e Kushtetutës do të ndëshkohen nga qytetarët. “Jemi të vendosur të vazhdojmë deri në zmbrapsjen e këtyre që kanë kapur shtetin e Kosovës”, tha Haradinaj.
Fatmir Limaj, lider i NISMË-s për Kosovën, tha se kolegët e tij deputetë kanë lëshuar një rast për të refuzuar kandidatin e propozuar nga koalicioni. “Ata iu nënshtruan presionit dhe kësaj elite politike. Jo vetëm që nuk u largua kriza, por nga sonte Kosova u zhyt edhe më shumë në krizë”, tha ai. Limaj tha se opozita do ta vazhdojë kauzën e saj për të rritur shpresat te qytetarët e Kosovës për ndryshim. “Mbi 70 për qind e qytetarëve të Kosovës janë të pakënaqur me zhvillimet në Kuvend. Ishte një derë e vogël sa ishte institucioni i presidentes dhe një mundësi për të dalë nga kriza, por nga sot u mbyll edhe kjo derë”, tha Limaj.
