Jennifer Aniston, Courteney Cox, Lisa Kudrow, Matt LeBlanc dhe David Schwimmer kanë dhënë një deklaratë të përbashkët duke nderuar yllin e ‘Friends’, Matthew Perry, i cili ndërroi jetë të Shtunën në moshën 54-vjeçare. Ata janë shprehur se ndihen të shkatërruar nga humbja e mikut të tyre dhe se do t’ju duhet kohë që të pranojnë këtë humbje.
“Ne jemi të gjithë shumë të shkatërruar nga humbja e Mateut,” thanë pesë aktorët. “Ne ishim më shumë se thjesht shokë të kastit. Ne jemi një familje. Kemi shumë për të thënë, por tani do të shfrytëzojmë kohën për të pranuar këtë humbje të pamatshme. Do të flasim më shumë, sapo të jemi në gjendje që ta bëjmë këtë. Tani për tani, mendimet dhe dashuria jonë janë me familjen e Mattyt, miqtë e tij dhe të gjithë që e donin”.
Perry, i cili ishte i njohur për performancën e tij si Chandler Bing sarkastik dhe i dashur në serialin hit, u gjet i vdekur në vaskë në shtëpinë e tij në Los Anxhelos, thanë burimet e zbatimit të ligjit për mediat të Shtunën mbrëma.
Autopsia, në pritje të një raporti toksikologjik, do të përcaktojë shkakun e vdekjes së aktorit.
‘Friends’, një komedi rreth gjashtë profesionistëve që jetonin në New York City, ishte një fenomen, duke fituar çmime të shumta Emmy dhe duke arritur vlerësime rekord, ku pas 10 sezonesh, finalja e 2004 arriti më shumë se 52 milionë shikues në SHBA, duke e bërë atë episodin më të ndjekur televiziv të viteve 2000.
Gjithashtu bashkë-krijuesit e ‘Friends’, Marta Kauffman dhe David Crane, së bashku me producentin ekzekutiv Kevin Bright, lëshuan një deklaratë të përbashkët të Dielën.
“Duket ende e pamundur”, shkruan ata. “Gjithçka që mund të themi është se ndihemi të bekuar që e patëm atë si pjesë të jetës sonë. Ai ishte një talent i shkëlqyer. Është një klishe të thuash që një aktor e bën një rol të tijin, por në rastin e Matthew, nuk ka fjalë më të vërteta.”
Ndërkohë familja e Perry tha: “Ne jemi zemërthyer nga humbja tragjike e djalit dhe vëllait tonë të dashur. Matthew solli kaq shumë gëzim në botë, si aktor dhe mik. Ju të gjithë kishit shumë rëndësi për të dhe ne e vlerësojmë dashurinë tuaj të jashtëzakonshme.”
Selma Blair, Hank Azaria, Gwyneth Paltrow dhe kryeministri i Kanadasë, Justin Trudeau, ishin ndër të tjera që i bënë homazhe Perry-t pas vdekjes së tij.
/a.r
