Presidenti kinez Xi Jinping dhe presidenti amerikan Donald Trump zhvillojnë sot bisedime në Uashington, në një përpjekje për të bërë përparim në luftën tregtare mes dy vendeve. Takimi i tyre i fundit, në maj në Pekin, nuk prodhoi rezultate konkrete.
Sipas Miko Huotarit, drejtor i institutit gjerman MERICS, si Pekini ashtu edhe Uashingtoni po veprojnë me bindjen se rivaliteti mes tyre do të jetë afatgjatë. Për këtë arsye, të dyja palët kanë nevojë për kohë dhe situata aktuale përshkruhet si një “ngërç strategjik”.
Një marrëveshje mund t’i shërbente edhe interesave të Partisë Republikane përpara zgjedhjeve të Kongresit në nëntor, por mbetet e pasigurt nëse do të arrihet një rezultat konkret. Një nga çështjet kryesore të rivalitetit SHBA-Kinë është inteligjenca artificiale. SHBA-ja ka kufizuar eksportin e çipave të avancuar drejt Kinës, ndërsa Pekini ka kufizuar eksportin e metaleve të rralla, të rëndësishme për prodhimin e çipave.
Xi dhe Trump pritet të diskutojnë edhe masat mbrojtëse ndaj rreziqeve të inteligjencës artificiale. Kina mbështet bashkëpunimin ndërkombëtar në zhvillimin e kësaj teknologjie, ndërsa administrata Trump e konsideron rregullimin e saj një çështje që mund të ndikojë në udhëheqjen teknologjike amerikane. Pas takimeve në Nju Jork, sekretari amerikan i Thesarit, Scott Bessent, tha se zyrtarët amerikanë dhe kinezë kishin diskutuar krijimin e një “mekanizmi alarmi” për shkëmbimin e informacionit mbi incidentet e sigurisë që lidhen me AI-n.
Kina së fundi ka intensifikuar kontaktet me aleatët e SHBA-së dhe vende të tjera. Xi mori pjesë në samitin e BRICS në Indi dhe në samitin e Organizatës së Bashkëpunimit të Shangait në Kirgistan, ndërsa Pekini do të presë gjithashtu samitin e APEC-ut në nëntor.
