JAVANEWS/ Selami Xhepa, një nga ekspertët më të mirë të ekonomisë shqiptare, në një prononcim për Javaneës, shprehet se ajo çfarë ka ndodhur në Britani është një zhvillim shumë serioz me efekte ekonomike dhe politike të ndërthurura. Ndonëse ky vendim në planin ekonomik nuk do të ketë ndonjë ndikim në lidhje me Shqipërinë, pasi, sipas tij, shkëmbimet ekonomike mes dy vendeve janë të ulëta, në planin politik, por edhe në të ardhurat që emigrantët shqiptarë u dërgojnë familjeve shqiptare, do të ketë ndikimet e veta pasi parashikohet një rënie e ndjeshme e të ardhurave për britanikët në masën 2.5%.
“Shqipëria nuk ka lidhje të mëdha ekonomike me Britaninë. Edhe Eurobondi ynë që ndodhet në Britani është në euro. Më shumë efektet do të jenë politike, pasi vendimi për të dalë nga BE I britanikëve do të çojë detyrimisht në nevojën e reformimit të BE-së, gjë që mund të lerë në hijë vendet të cilat duan të bëhen pjesë e Union-it”, shprehet Xhepa.
Sipas tij, efektet negative të vendimit të referendumit u panë që në orët e para të mëngjesit ku paundi britanik përsoi një rënie të ndjeshme në raport me dollarin, një rënie që nuk ishte parë që pas luftës së dytë botërore. Xhepa parashikon që letrat me vlerë do të bien në tregjet financiare ndërkohë që pritet të rriten edhe kostot e transaksioneve gjë që mund të çojë dhe në ekspozimin e krizës së likuiditeteve.
“Standard & Poor’s pritet të dalë këto ditë me një raport të sajin dhe natyrisht pritet që të ulë kualifikimin për Britaninë. Besoj do të ketë një marrëveshje të re me Britanisë dhe BE-së, pasi 50% të shkëmbimit të mallrave ajo i ka me vendet e Bashkimit Europian. “De jure” Britania është ende në BE. Natyrisht që kemi të bëjmë vërtetë mejë situatë serioze e cila do të ketë pasoja si në planin afatshkurtër edhe në atë afatgjatë”, shprehet Xhepa.
Sipas tij, duhet të ketë një reflektim ndaj këtij rezultati, pasi forcat anti- BE janë ende të fuqishme dhe kanë marrë akoma më shumë zemër pas “Jo”-së së britanikëve. Sipas tij vetë Unioni do të jetë i detyruar të bëjë reforma, pasi vihet re se ka një deficit sa i përket aspektit demokratik të vendimarrjes.
(javanews.al) Me. Ar
