Mesfushori me origjinë shqiptare, Granit Xhaka ishte i vetmi që e mbajti kokën lart pas humbjes turpëruese ndaj Chelsea në finalen e Europa League. Ishte pikërisht Xhaka që i thirri të gjithë lojtarët e Arsenal që të mos largoheshin menjëherë nga fusha, por të përshëndetnin tifozët e pranishëm.
Ai gjithashtu lëshoi një deklaratë befasuese ndaj trajnerit Unai Emery, duke mos i dalë në mbrojtje.
“Humbëm një shans të artë për të shpëtuar sezonin tonë. Pas dështimit në kampionat, mund të bënim më mirë në finale. Gabuam shumë, pavarësisht se e dominuam kundërshtarin për 60 minuta. Chelsea reagoi vetëm për disa minuta dhe arriti të na mundte. Të gjithë në dhomat e zhveshjes ishin të dështuar dhe askush nuk fliste. Kishim mundësinë që të merrnim pjesë në Champions League nëse do të fitonim, por nuk ia dolëm”, tha Xhaka. I pyetur nëse Arsenali është më mirë tani sesa me Wenger, ai nuk donte të jepte një përgjigje.
“Nuk jam unë personi i duhur për të thënë këtë përgjigje. Nuk e di”, tha mesfushori me origjinë shqiptare, duke lënë të kuptohet që jo. Ai ka reaguar i surprizuar kur është pyetur nëse do të largohet gjatë kësaj merkatoje. “Unë? As nuk e çoj ndërmend diçka të tillë. Unë kam kontratë me Arsenalin dhe do të vazhdoj të qëndroj këtu”, ka thënë 26-vjeçari i “Topçinjve”.
