Taulant Xhaka nuk do jetë më pjesë e Kombëtares deri në momentin që De Biazi të jetë në krye të pankinës. Në një intevistë të fundit, lojtari grintoz është treguar shumë i drejtpërdrejtë kur është pyetur për problemet e fundit në Kombëtare si dhe tregon se ka bërë të gjitha përpjekjet për të sqaruar çdo gjë me teknikun kuqezi, por nuk ia ka dalë dot.
Mbi të gjitha nuk harron të shprehet se pavarësisht këtij vendimi lidhja me përfaqësuesen kuqezi është ende e madhe dhe e pandërprerë për asnjë moment.
LARGIMI
I pyetur në lidhje me vendimin për t’u larguar nga Kombëtarja, mesfushori rrëfen bisedat e mbetura në tentativë me trajnerin De Biazi si dhe të gjitha situatat që e kanë sjellë çështjen deri në këtë pikë drastike.
“Unë u largova nga grumbullimi se ai trajner nuk më ka dhënë asnjë arsye se pse unë nuk luaj. Së dyti, aty ka lojtarë që luajnë nëpër ligat e dyta dhe që as nuk luajnë nëpër ekipet e tyre dhe janë aktivizuar përpara meje”, shprehet fillimisht mesfushori i Bazelit.
TRAJNERI
Xhaka bën me dije se asnjëherë nuk ka arritur të komunikojë me De Biazin në lidhje me këtë situatë të krijuar. Ai shton se italiani i është shmangur sa herë që Xhaka ka kërkuar bisedë me të.
“Së treti, kam dashur që të flas me trajnerin, por gjithmonë më largohej që të mos bisedonte me mua. Kjo sepse ai nuk kishte asnjë arsye për të m’u përgjigjur”, vijon akuzën e tij futbollisti i Kombëtares.
DEKLARATA
Në lidhje me shpjegimin që trajneri De Biazi dha në konferencën për shtyp, Xhaka tregon se tekniku ka gënjyer.
“Me keqardhje, por më vjen turp të them që gënjen kur trajneri thotë se ika për shkak se pata probleme personale”, ka deklaruar Xhaka.
KOMBËTARJA
Mesfushori insiston në fjalën e tij se nuk ka pasur asnjë problem me askënd në skuadër dhe se nuk ka menduar kurrë largimin nga Kombëtarja. Mirëpo, Xhaka tregon edhe vendimin drastik që ka marrë kundrejt trajnerit De Biazi.
“Unë nuk kam asnjë problem. Me askënd në skuadër. Madje, as nuk jam larguar nga Kombëtarja. Unë luaj me zemër dhe shpirt si kuq e zi, por sa të jetë ky trajner, unë nuk do të vij më”, u shpreh Xhaka për “Panorama Sport”.
a.ç
