Xhafaj takim me homologun austriak

Në prag të Ministerialit të vendeve të BE-së dhe atyre të Ballkanit Perëndimor për Drejtësinë dhe Punët e Brendshme, që zhvillohet këto ditë në Tiranë, ministri i Brendshëm Fatmir Xhafaj, ka pritur sot homologun e tij austriak , Herbert Kickl.
“Biseda me ministrin Kickl, u fokusua në thellimin e bashkëpunimit mes vendeve tona në fushën e sigurisë, tematikën dhe pritshmëritë e Ministerialit, i cili është duke u zhvilluar në Tiranë, nën kujdesin e veçantë të Presidencës austriake të BE-së”, shkruan ministri Xhafaj në një postim në Twitter.
Sot dhe nesër do të zhvillohet në Tiranë, Ministeriali mbi Çështjet e Brendshme dhe Drejtësisë mes vendeve te Ballkanit Perëndimor dhe Bashkimit Evropian. Të pranishëm do të jenë Komisioneri i Bashkimit Evropian për Çështjet e Brendshme dhe Migracionin, Z. Avramopulos, Ministri i Brendshëm i Austrisë, vend i cili ka aktualisht Presidencën e Këshillit të Bashkimit Evropian, ministra dhe përfaqësues të tjerë të lartë të vendeve të Bashkimit Evropian dhe një sërë organizatave ndërkombëtare.
Ministrat do të diskutojnë për forcimin e bashkëpunimit në fushën e sigurisë, zbatimin e ligjit, menaxhimin e kufijve, migracionit dhe çështje të ekstremizmit të dhunshëm. Ky vullnet i përbashkët do të materializohet përmes nënshkrimit nga Ministrat pjesëmarrës në Ministerialin e Tiranës të disa marrëveshjeve të rëndësishme të bashkëpunimit në këto fusha./a.m.