Sulmet ndaj Presidentit të Republikës Bujar Nishani në lidhje me funksionimin e Këshillit të Lartë të Drejtësisë këtë radhë kanë ardhur nga një zë tjetër brenda mazhorancës.
Është kreu i Komisionit të Ligjeve Fatmir Xhafaj i cili tha se është skandalizuar me deklaratat e fundit të Nishanit. Sipas tij duhet një ndërhyrje në sistemin e gjyqësorit, dhe veçanërisht në KLD që sipas Xhafajt është kthyer në një korporatë.
“Kam lexuar një intervistë të Presidentit të Republikës dhe jam skandalizuar. Në ditën e drejtësisë Presidenti flet sikur flitet për Gjykatat në Danimarkë, Suedi, Itali apo ku e di unë se çfarë. Vetëm për Gjykatat e Shqipërisë nuk foli, që janë të mbushura me korrupsion, që KLD është kthyer në një korporatë. Nuk poi hy më asaj logjikës së Presidentit, një logjikë antikushtetuese që sekretari i Përgjithshëm na zëvëndësoka Zv/kryetarin e KLD, një funksion kushtetues. Sipas kësaj logjike kur ik presidenti jashtë vendit e zëvendësoka sekretari i Përgjithsëm i Presidencës”, tha Xhafaj.
Deklaratën Xhafaj e bëri gjatë mbledhjes së Komisionit të Ligjeve ku u diskutua raporti i Avokatit të Popullit për vitin 2014.