Deputeti socialist, Fatmir Xhafaj pasi ka hedhur votën për pyetjen e shtruar në referendumin e sotëm të PS, është shprehur se ky referendum është shprehje e kulturës dhe demokracisë që ekziston në këtë forcë politike.
I pyetur lidhur me faktin se më parë ai ishte shprehu kundër këtij referendumi, i cili në fakt u propozua nga kreu i PS, Xhafaj u shpreh se qëndrimi i tij lidhej me faktin se statuti i votuar në kongres arrinte t’i jepte një zgjidhje të mirë çështjes së kryetarit të partisë.
“Unë bëj pjesë tek ata që kanë debatuar nëse duhet të ketë apo jo referendum. Unë mendoj se statuti i miratuar në kongres i jepte zgjidhje më së miri këtij problemi. Rama është votuar si kryetar dhe kryeministër. megjithatë organizimi i referendumit ka shkuar më së mirë, mund të them që është një proces shembullor”, tha Xhafaj.
Ndërkohë, nga Shkodra, deputetja socialiste Mimoza Hafizi ka denoncuar mungesën totale të informacionit lidhur me listat e anëtarësisë apo adresat e qendrave të votimi në këtë qytet.
“Jam në terr informativ. Nuk di se ku janë adresat e qendrave të votimit. Ky referendum është një farsë”, është shprehur Hafizi.
