Xhafaj: Prokurorë të huaj në hetimin e çështjeve në Shqipëri
Fatmir Xhafaj i ftuar në Tonight Ilva Tare ka folur për reformën në drejtësi ku midis të tjerash ka thënë se përfshirja e ekspertëve ndërkombëtarë deri në fund të reformës do të jetë e pamjaftueshme dhe se për të përfunduar reformën, do të vijnë të tjerë ekspertë të cilët do të jenë nga fusha e drejtësisë dhe do të marrin pjesë direkt në hetimin e çështjeve. “Ka një çështje që ka të bëjë me përfshirjen e Brukselit në procesin e zbatimit të vendimmarrjes. Do të jetë në proces vendimmarrës, pra pjesë e institucioneve vendimmarrëse shqiptare. Do të ketë prokurorë të huaj që do të jenë pjesë e hetimit dhe ka një diskutim deri në ç’masë do të përfshihen. Në parim Brukseli është shprehur plotësisht dakord për produktin e ekspertëve ndërkombëtarë dhe shqiptarë”, tha Xhafaj.
Fatmir Xhafaj, njeriu kyç në këtë reformë, i cili e konsideron edhe si një angazhim të jetës së tij politike kryerjen e saj, argumenton se pse shqiptarët duhet të kenë besim se ky sistem do të bëhet.
“Ndryshe nga herët e tjera edhe në metodologji ka një gjë krejt ndryshe. Ekpertët ndërkombëtarë e kanë fillluar njëkohësisht me ne procesin, ajo që ka zgjatur më shumë ka qenë analiza e sistemit gjë që i ka ndihmuar ata që të kuptojnë se cila është gjendja e sistemit, problematikat. Nuk janë thjesht në rolin e atij që vjen nga jashtë, jep një këshillë, bën një raport dhe ikën. Jo, janë ulur si me thënë këmbëkryq bashkë me ne në proçes. Nga një analizë e detajuar e të gjithë elementëve të proçesit kanë kaluar në një strategji për zhvillimin e reformës. Kjo ka ndihmuar ekspertët ndërkombëtarë dhe vendas të jenë me këmbë në tokë dhe ti përgjigjen këtij realiteti. Të arrijnë në përfundime që janë të vlefshme për këtë realitet dhe pastaj në zgjidhjet konkrete që janë të dobishme për të shëruar këtë situatë konkrete”, deklaroi ai.
I ftuar në emisionin Tonight Ilva Tare, kreu i Komisionit për Reformën në Drejtësi foli dhe për rolin dhe angazhimin e dy Ambasadorëve, atij të SHBA dhe BE: “Unë nuk jam dhe shumë i mirë në këto marrëdhëniet diplomatike me ndërkombëtarët, por do them atë që mendoj unë. Nuk janë thjesht konsulentë, janë aktivë, janë të përfshirë në proçes, e ndjekin proçesin po aq sa e ndjek dhe unë, në mënyrë të përditshme. Takohemi rregullisht dhe duan të dinë detaj më detaj ecurinë e proçesit, diskutojmë, debatojmë, kolaudojmë. Japin sugjerime për rrugën, mënyrën. Është një debat që arrihet në përfundimin që duhet hedhur ky hap apo nuk duhet hedhur ky hap, duhet bërë kujdes në këtë hap, duke pasur parasysh dhe problematikën që ka vendi, konfliktet politike, nevojën që ka për të gjetur më shumë mirëkuptim. Kanë dhe fatin që ekspertët e tyre nuk janë në rolin e konsulentit, janë në rolin e hartuesit, vepruesit, janë pjesë e proçesit”.
