Ministri i Brendshëm, Fatmir Xhafaj ka deklaruar se qeveria ka vullnet të plotë për garantimin e zgjedhjeve të lira dhe kërkoi që të mos politizohet roli i policisë së shtetit. Ai dha garanci se policia do të sigurojë një proces zgjedhor shembullor.
“Zgjedhjet e 18 qershorit po afrojnë dhe detyra jonë, detyra e Policisë së Shtetit, është që të ushtrojmë detyrat e ngarkuara nga ligji me paanësi, me qëllim mbarëvajtjen e sigurinë e tyre për të garantuar një proces të pacenuar dhe shembullor. Është hap mbrapa që në një shtet të së drejtës të kërkosh që zgjidhjet politike t’i realizosh përmes të ashtuquajturave kompromise që politizojnë dhe rrezikojnë funksionin dhe rolin e Policisë së Shtetit. Ne e kuptojmë shumë mirë rëndësinë jetike që ka sjellja e policisë në një proces zgjedhor. E dimë shumë mirë se çfarë dëmi mund të sjellë edhe për atë forcë që është në qeveri, nëse nuk garanton sjellje dhe veprim të policisë në përputhje me kushtetutën dhe me ligjin”, tha Xhafa.
Ministri i Brendshëm tha edhe një herë se çdo punonjës policie do të kalojë në vetting, në mënyrë që në radhët e policisë së shtetit të mos ketë asnjë person me precedentë penalë.
“Do bëjmë çdo gjë për një polici të pastër dhe pa elementë të korruptuar në shërbim të qytetarëve. Jemi të vendosur për të bërë shtet përmes reforma dhe policia ka luajtur një rol kyç në këtë proces. Sot policia e shtetit është në krye të detyrës dhe me një pamje krejtësisht të ndryshuar. Sot kemi një polici më të mirë, më të trajnuar dhe më të përgatitur profesionalisht. Punonjësi i policisë mbetët aleati numer 1 i qytetarit. Të gjithë kemi nevoje për policë e drejtues policie me integritet të lartë profesional. Jam angazhuar për një proces të ri në policinë e shtetit për veting të cdo punonjësi të policisë së shtetit. Një punonjës policie që është direkt apo indirekt mbështetes i një elementi kriminal do të ndëshkohet. Do u japim qytetarëve policinë qe duan. Do ndëshkohën kushdo që nuk kryen detyrën e tij në luftën kundër krimit dhe drogës”, tha Xhafa.
Ministri i Brendshëm deklaroi se policia i ka shpallur luftë fenomenit të kanabisit dhe garantoi se nuk do të ketë kompromis me askënd. Xhafaj dha edhe një paralajmërim për çdo efektiv policie, se nëse lejon kultivimin e kanabisit apo nuk raporton, do të ndiqet e njëjta procedurë si në Kurbin, ku shefi i Komisariatit dhe disa efektivë u përjashtuan nga policia.
“I kemi shpalluir luftë të hapur fenomenit të kanabisit. Nuk do të bëjmë asnjë kompromis me askënd, Do ketë ndëshkim për cdo rrënjë kanabis të mbjellë. Qëndrimi që mbajtëm në komisariatin e Kurbinit do jetë i njëjtë në cdo komisariat të vendit në rast se ka abuzime. Edhe tolerimi i vogël kundrejt kultivuesve të drogës do të ndëshkohet”, deklaroi Xhafa.
a.ç
