Një denoncim i një gjysheje në Durrës, se ish-nusja kishte lënë vetëm 3 fëmijët e saj të mitur në pallatin ku banonte, ka vënë në alarm autoritetet shtetërore. 3 fëmijët e mitur u gjetën vetëm brenda në banesë, në kushte aspak higjienike, dhe u dërguan në spital për ekzaminime pasi siç thonë burime për Report Tv, kishin 3 ditë pa ngrënë. 33-vjeçarja ishte e divorcuar dhe prej kohësh dyshohet se kishte një konflikt me ish-vjehrrën për kujdestarinë e fëmijëve. Tashmë, siç sqarojnë burimet për Report Tv, autoritetet pritet t’i heqin 33-vjeçares kujdestarinë e të miturve.
Fëmijët kishin 1 muaj që nuk shkonin në shkollë. Pas ekzaminimeve të kryera në spitalin e Durrësit ka rezultuar se ata janë të infektuar me zgjebe. Mësohet se 3 fëmijët janë të izoluar në një dhomë më vete bashkë me nënë me qëllim që kontaminojnë ambientet dhe të përhapet tek fëmijët e pediatrisë. Nëna pretendon se fëmijët i mbante të izoluar në banesë pasi ishin të infektuar me zgjebe dhe se edhe shkolla ishte në dijeni për mungesën prej 1 muajsh në shkollë.
33-vjeçarja prej 3 muajsh jetonte me qira në pallatin në Durrës ku u gjendën 3 fëmijët dhe punonte si banakiere në qytetin bregdetar të Durrësit. Ajo pretendon se fëmijët i mbante në banesë vetëm, pasi duhej të punonte për të siguruar të ardhura dhe se aktualisht paguhet vetëm 40 mijë lekë.
Edhe një prej fëmijëve, 10 vjeç, mësohet të ketë deklaruar se e ëma nuk i linte vetëm, por ajo ikte dhe vinte. Ndërkohë, nëna 33-vjeçare në dëshminë e saj ka pretenduar se ky është një kurth i ngritur nga ish-vjehrra, që sipas saj e ka paditur se braktis fëmijët. Ajo thotë se është e detyruar që t’i lërë vetëm gjatë kohës që punon, për shkak se nuk kanë të ardhuara dhe se babai paguan vetëm 18 mijë lekë në muaj.
“Punoj banakiere dhe të tre fëmijët i lë së bashku kur iki në punë. Paguhem 400 mijë në muaj dhe paguaj 300 mijë qiranë. E kam të pamundur që të rri me fëmijët, se s’kam të ardhura me çfarë të paguaj qiranë dhe t’i ushqej. Ky është kurth nga ish-vjehrra, e cila më ka paditur se braktis fëmijët. Si mund ta bëj këtë kur unë vetë punoj?
Më ka hyrë pa leje në shtëpi, ka mësuar fëmijët të flasin keq kundër meje. Nuk e di, por kjo është e patolerueshme: si vjen në shtëpinë time pa leje dhe më denoncon në polici? Do t’i mbroj fëmijët, se babai i fëmijëve ka qenë në burg në Itali për 5 vjet. Doli nga burgu dhe ka paguar për fëmijët 180 mijë lekë të vjetra. Si mund t’i ushqej fëmijët me 180 mijë të vjetra në muaj?”, ka dëshmuar nëna.
Historia mes çiftit duket e koklavitur. Babai i 3 fëmijëve ka qenë 5 vite në burg në Itali. Pasi ka shlyer dënimin, ish-burri i ka kërkuar 33-vjeçares të ribashkohen dhe kanë qëndruar në Itali gjatë vitit 2025 për një periudhë të shkurtër kohore. Fëmijët kishin marrë edhe dokumentet italiane, por në muajin shtator 2025, 33-vjeçarja është kthyer në Shqipëri dhe 3 fëmijët i ka lënë te ish-bashkëshorti. Më pas ajo ka marrë dhe fëmijët dhe i ka regjistruar në shkollë në Durrës.
Ndërkohë, gjyshja e fëmijëve dje ka publikuar një video nga brenda banesës, ku tre të miturit dallohen të ulur në krevat, ndërsa ajo pretendon se janë braktisur nga e ëma. Në video dallohen edhe kushtet higjienike në të cilat jetojnë fëmijët, me banesën e mbuluar nga plehrat dhe rrobat.
