Xhafaj: Nuk ka përçarje PS-LSI, politika fajtore për situatën në drejtësi
Deputeti i PS, njëherësh edhe kryetar i Komisionit të Ligjeve, Fatmir Xhafaj, i është përgjigjur sot interesit të medias sa i përket zhvillimeve politike në vend si dhe reformës që pritet të bëhet në sistemin e drejtësisë.
I pyetur mbi aludimet se ka një përçarje PS-LSI, Xhafaj e mohoi duke thënë:
“Ka nevojë për më shumë përgjegjshmëri në këtë bashkëqeverisje në sensin e raporteve dhe brenda koalicionit. Nuk më duket serioze që shumë gjëra tëe trajtohen nëpërmejt deklaratve, intervistave apo Facebook”, tha Xhafaj.
Ai tha gjithashtu se opozita ka një shans të mirë për të qënë pjesë konstruktive e procesit.
“Unë besoj që opozita ka një shans të mirë për të qënë pjesë konstruktive e këtij procesi. Së paku, në këto 16 vjet ka qënë 8 vjet në pushtet PD, dhe po aq edhe PS dhe aleatët e tyre. Kështu që më së paku do të duhej që politika e të gjithë krahëve të bënte një “mea culpa” për realitetin që kemi sot. Në fund të fundit është politika ajo që ka lejuar apo ndikuar që sistemi i drejtësisë sonë të karakterizohet me një sërë problematikash të thella që cënojnë dhe kanë cënuar pavarësinë e tij, llogaridhënien, efikasitetin dhe përgjegjshmërinë për të dhënë drejtësi për qytetarët”, tha Xhafaj.
Kreu i reformës në drejtësi ka shprehur edhe rezerva lidhur me deklaratat e kreut të shtetit, Bujar Nishani.
“Ka një pikë që bashkohem me presidentin që është shumë e rëndësishme: vlera, integriteti moral dhe politik i personit që ulet në karrigen e Presidentit. Nuk jam dakord në shumë çështje që ka trajtuar dhe në gjuhën e përdorur për misionin e tij kushtetues, dhe nuk besoj se është punë të merresh me Presidentin e Republikës, as siç nuk mendoj që është punë të japësh intervista për të gjykuar apo intimiduar të tjerët. Nëse secili do kishte bërë punën e tij në gjithë këto vite dhe nëse të gjithë do të bëjnë shumë mirë punën e tyre sot, jam i bindur që nuk do të kishim këtë sistem drejtësie që kemi sot”, vijoi z. Xhafaj.
