Ministri i Punëve të Brendshme, Fatmir Xhafaj, i është përgjigjur akuzave të Partisë Demokratike përmes një konference për shtyp.
Duke sqaruar pozicionin e tij, Xhafaj tha se kjo është një politikë e ulët dhe baltosje ndaj punës së tij. Sipas ministrit, historia e vëllait të tij në vitin 2002 kur ai ishte një i ri, nuk e implikon qeverinë.
“Partia Demokratike ka më shumë se 15 vjet që e sjell dhe e risjell në vëmendje të publikut këtë çështje dhe këtë e bën sa herë kërkon të luftojë me baltë atë që nuk e lufton dot me argumenta punën time dje për reformën në drejtësi dhe sot si ministër. Vendimi i drejtësisë italiane i gjendshëm lehtësisht kudo, ka dalë sot si diçka e re. Dhe unë nuk duhet të bëj gjë tjetër veçse të përsëris veten. Akoma nuk kam mundur të kuptoj se cili është problemi dhe detyrimi im për çfarë ka bërë përpara 15 vitesh im vëlla” – tha ministri i Brendshëm.
Sipas Xhafajt, vetë ai nuk ka pasur dhe as ka ndonjë ndikim mbi këtë çështje të ndodhur në vitin 2002.
“As qeveria e tyre dhe as ajo më pas nuk janë kontaktuar nga autoritetet e një vendi tjetër për të kërkuar çfarëdoqoftë për këtë çështje. Historia e tim vëllai në vitin 2002 kur ai ishte 25-vjeçar nuk e implikon qeverinë ku unë bëj pjesë. Ajo çfarë është më e rëndësishme është fakti se kjo qeveri nuk i garanton imunitet askujt. Të tjerat janë politikë e ulët dhe nuk janë puna ime” – deklaroi Fatmir Xhafaj. /JavaNews/b.d
FJALA E PLOTË
Sot Partia Demokratike paketoi mediatikisht si zbulim të ri një çështje të ndodhur në vitin 2002, e cila ka më shumë se 15 vjet që e sjell dhe e risjellë në vëmendje të publikut këtë çështje!!
Dhe kjo ndodh sa herë që kundërshtarëve politike u duhet të luftojnë me baltë, çka nuk luftojnë dot me argumenta në punën time, si dje gjatë reformës në drejtësi ashtu edhe sot si Ministër i Brendshëm.
Vendimi i gjykatës italiane, lehtësisht i gjendshëm edhe online, i ditur dhe i njohur prej vitesh prej tyre dhe prej kujtdo tjetër të interesuar, shqiptar apo partner ndërkombëtar, i publikuar dhe i stërpublikuar në mediat prane tyre, ka ridalë sot si e vetmja armë kundërshtie mesa duket ndaj meje, sot si Ministër i Brendshëm.
Dhe mesa duket unë nuk duhet të bëjë gjë tjetër veçse të ripërsëris veten në lidhje me riprezantimin e kësaj akuze.
Duket e thjeshtë, por akoma unë nuk kam mundur të kuptoj se cili është problemi i personalitetit tim si njeri dhe si zyrtar në lidhje me çfarë bën, apo akoma më shumë se çfarë ka bërë para 15 vitesh im vëlla. Ndërkohë që nuk kam se si të kuptoj çfarë kërkohet sot tjetër përveç baltosjes sime, nëse në raport me këtë çështje as kam pasur e as kam asnjë lloj pushteti për të ndikuar në çfarëdolloj forme mbi të.
Kjo është një çështje e zhvilluar në Itali, në kohën kur këta që sot e rizbuluan ishin në pushtet, dhe asnjëherë në asnjë rast, as qeveria e tyre, as Qeveria tjetër më pas dhe as kjo Qeveri nuk janë kontaktuar as shkresërisht, as informalisht nga autoritetet e një vendi tjetër për të kërkuar çfarëdoqoftë për këtë çështje.
Nuk kam se çfarë t’i shtoj më shumë atyre çfarë unë kam thënë publikisht në lidhje me këto akuza se sa unë kam thënë në 2002, 2005, 2010, 2016 dhe 2017.
Gjithkush i interesuar gjen në këto deklarime qëndrimin tim koherent në lidhje me këtë çështje.
Historia e tim vëllai, e lidhur me një ngjarje të vitit 2002, kur ai ishte një 25-vjeçar i gjendur në vendin e gabuar dhe nën shoqërinë e njerzëve të gabuar, nuk e implikon as dje dhe as sot qeverinë ku unë bëj pjesë. Ajo ka qënë e mbetet një histori e tij personale dhe vetëm e tij.
Cilido në këtë vend, përfshi dhe mua apo familjarët e mi nuk është mbi ligjin.
Por ajo çfarë është më e rëndësishme është fakti se kjo qeveri nuk i siguron dhe nuk i garanton imunitet nga shkelja e ligjit askujt. As mua! Këtu jam dhe do jem, një qytetar i vendit tim që kurrë nuk ka shkelur e nuk do të shkelë ligjin, as për llogarinë time dhe as për llogarinë e të afërmve apo të njohurve të mi. Të tjerat janë politikë e llojit më të ulët dhe nuk janë puna ime.
