Protesta e studentëve për të parën herë nuk u pa si kërcënim, por si një mundësi dialogu për zgjidhjen e problemeve të studentëve dhe tashmë Pakti për Universitetin është zgjidhja e më shumë sesa kërkesave të tyre, tha Ministrja e Mbrojtjes Olta Xhaçka, sot në foltoren e Kuvendit, prej nga akuzoi opozitën se po përdor pedagogët për të penguar mësimin në universitete.
Për herë të parë në historinë politike të Shqipërisë, tha Xhaçka, kjo qeveri e priti një protestë jo si një kërcënim por si një mundësi për të filluar një dialog konstruktiv me të gjithë ata që duan realisht të transformojnë dhe modernizojnë universitetin shqiptar
“Iu ofruam studentëve Paktin për Universitetin që shkon shumë përtej tetë kërkesave që ata kanë akumuluar dhe që shënon fillimi e një kthese të jashtëzakonshme për të gjithë sistemin e Arsimit të Lartë. Fatkeqësisht ndodhi ajo që ka ndodhur me çdo reformë apo punë të mirë që është bërë për këtë vend. U ngrit opozita për të sabotuar me të gjitha forcat për të penguar zgjidhjen për studentët. U ngrit opozita, pasi dështoi të uzurponte protestën e studentëve dhe pasi u braktis prej studentëve që nuk kishin hallin e Lulit dhe Monikës, por kërkonin zgjidhjen e problemeve të tyre. Madje organizoi në protestë ca me tesera partie dhe ca grupe të gatshme, ca nga PD e ca nga LSI, për të bllokuar mësimin, duke bërë presion, duke shantazhuar çdo student dhe pedagog që donte rikthimin në mësim”, tha ministrja Xhaçka.
Më tej Xhaçka shtoi se opozita pasi dështoi me lojën me studentët, futi në lojë pedagogët.
“Kemi parë skenat e takimeve të këtyre pedagogëve dhe nuk e di janë për të qeshur apo për të qarë. Te shihje vajzën e ish-kryeministrit me kunatën e tij, bashkë të dyja pedagoge duke qarë hallet e studentëve, të shihje ish-deputetin e PD, bashkë me të shoqen e bashkë me vajzën e Fahriut, mbesat, nuse, fisin dhe farefisin e PD-së, që u qanin hallin studentëve. Pastaj, lere të shihje Mynyr Konin që e shihte protestën nga larg dhe në vend që të respektonte vendimin e masës dërrmuese të pedagogëve për rifillimin e mësimit bëhej pjesë e kësaj farse”, tha ajo.
Xhaçka përfundoi duke thënë se pedagogët nuk janë ngritur për hallin e studentëve por se ua ka kërkuar partia, cilado qoftë ajo. “Janë ngritur nga frika e vettingut dhe për ruajtjen e privilegjeve të tyre”, tha ajo.
/a.meta
