Serena Williams do të bëjë rikthimin e saj në tenis pas lindjes së vajzës, në Mubadala World Tennis Championship në Abu Dhabi.
Williams nuk ka luajtur qëkur fitoi Grand Slamin “Australian Open” në janar të këtij viti, ndërsa ishte gjashtë javë shtatzënë atëbotë, por do të rikthehet në fushë për të luajtur me kampionen e “Roland Garrosit”, Jelena Ostapenkon, të shtunën e ardhshme, më 30 dhjetor.
Williams, 36-vjeçare, që ka lindur vajzën Alexis Jr në shtator, po planifikon të kthehet në garat e nivelit më të lartë muajin e ardhshëm në Grand Slamin “Australian Open”.“Unë jam e lumtur që do të kthehem në fushë në Abu Dhabi për herë të parë që nga lindja e vajzës sime në shtator”, ka deklaruar Williams për faqen zyrtare të turneut, shkruan “Daily Mail”, transmeton “Koha Ditore”.
“Mubadala World Tennis Championship kohë të gjatë ka shënuar fillimin e stinorit botëror të meshkujve. Jam e emocionuar dhe e nderuar që do të bëj kthimin tim dhe do të jem pjesë e pesë femrave që do të marrin pjesë në këtë turne. Mezi po pres të shoh tifozët në Abu Dhabi në edicionin e 10-të të kampionatit”.
Tenisti numër një në botë, spanjolli Rafael Nadal, po ashtu ishte paraparë të merrte pjesë në turne, por është tërhequr për shkak të problemeve që po ka me gju.
Serena Williams në karrierën e saj të lavdishme ka fituar plot 23 Grand Slame në konkurrencën individuale, 14 në atë të çifteve dhe dy në çifte të përziera.
Po ashtu Serena Williams ka të fituara edhe katër medalje të arta olimpike, së fundi fitoi të artat në çifte dhe konkurrencë individuale në “Londra 2012”, ndërsa kishte fituar të artë në çifte edhe në “Sydney 2000” dhe “Pekin 2008”. (b.an)
