Me një ndeshje të përfunduar, Deontay Wilder gati sa nuk u fut në një përleshje tjetër, raporton AP. Boksieri britanik Tyson Fury, që është kampion në versionet WBA dhe WBO në peshën e rëndë, u fut në ring pas përballjes, në të cilën Wilder mbrojti titullin WBC në peshën e rëndë me një nokaut të fuqishëm në raundin e nëntë ndaj polakut Artur Szpilka të shtunën mbrëma në “Barclays Center”. Fury shkaktoi një hare. “Unë jam luftëtar i rrezikshëm. Unë kam bërë emër me nokautet e mi. Dora ime e djathtë është e frikshme”, ka thënë amerikani Wilder, përcjell Koha Ditore. Wilder i ka dhënë një goditje të fuqishme me të djathtën në fytyrë Szpilkas, duke mbyllur përballjen në raundin e nëntë. Për të ishte fitorja e 36-të në boksin profesionist nga po aq meçe, 35 prej tyre i ka fituar me nokaut. Szpilka, që pësoi humbjen e dytë karshi 20 fitoreve, qëndroi disa minuta në ring dhe u dërgua më pas në spital.
Ish-kampionët e botës Mike Tyson dhe Lennox Lewis ishin pranë ringut kur Wilder dha atë goditje të tmerrshme që heshti publikun e shumtë polak që përkrahte Szpilkan. “Unë jam i befasuar që zgjati aq shumë, por ne kishim 12 raunde dhe të gjitha raundet nuk mund të jenë të bukura”, ka thënë Wilder. Fury po ashtu ishte pranë ringut dhe me të përfunduar ndeshja u fut në ring për një përballje me Wilderin, duke i kërkuar dyluftim. Fury nisi të ngacmonte amerikanin me fjalë.
