Për një Kombëtares si Shqipëria, Kampionati Europian është një turne që të ndryshon jetën, mentalitetin dhe pritshmëritë. Kjo vlen për skuadrën, tifozët dhe mbi të gjithë lojtarët. Megjithë eliminimin e pamerituar në fazën e grupeve, turneu në Francë shërbeu si vitrina e madhe e kuqezinjve, që shfaqën kualitetin dhe potencialin e tyre.
Ky është edhe rasti i Ermir Lenjanit. I nënvlerësuar në Ligue 1 franceze, me paraqitjet në Euro 2016, mbrojtësi i majtë i bindi të gjithë me paraqitje të nivelit të lart, duke tërhequr edhe vëmendjen e klubeve të mëdhenj. Sipas gazetës prestigjoze, “L’Equipe”, për shërbimet e 26-vjeçarit interesohen Werder Bremen në Bundesligë dhe AEK-u i Athinës nga Superliga greke. Elita e futbollit gjerman duket një mundësi joshëse për Lenjanin që të vazhdojë karrierren, pasi Nantes nuk shfrytëzoi opsionin për ta blerë pas sezonit të kaluar në huazim, ndërsa mbrojtësi nuk është në planet e Rennes, pavarësisht se ka kontratë me klubin deri në vitin 2017.
Werder Bremen dhe AEK i Athinës vazhdojnë të mbajnë nën vëzhgim situatën rreth lojtarit, i cili përveçse si mbrojtës, ka të dhënat teknike dhe kualitetin të luajë edhe si mesfushor apo në mbështetje të sulmit nga krahu i majtë. Me çmimin e kartonit që është rritur në mbi 1 milion euro, Ermir Lenjani tashmë është në pritje te ofertave konkrete, për të vazhduar karrierën në një tjetër ligë të madhe europiane.
SS/d.i.
