Menaxherja Wanda Nara është tërbuar nga fakti se bashkëshorti i saj Mauro Icardi nuk po luan më me skuadrën e Interit. Sulmuesi argjentinas nuk është grumbulluar për ndeshjen që zikaltërit do të luajnë sot ndaj Cagliari në javën e dytë të Serisë A.
Sipas “Corriere Della Sera”, Wanda Nara ka akuzuar klubin e Interit se ka dështuar qëllimisht çdo përpjekje të saj në merkato për të shitur sulmuesin.
Ajo akuzon klubin se nuk ka lejuar që Icardi të shkojë te Juventusi, që e kërkon në formë huazimi me të drejtë blerje pas një viti. Ndërsa Inter synon ta largojë Icardi vetëm në shkëmbim me Dybala.
Kjo ka sjellë padinë e sulmuesit në dëm të klubit. “Kërkesa për t’u dëmshpërblyer është rrjedhojë e atyre që kanë ndodhur dhe jo objekti kryesor i akuzës tonë. Kjo kërkesë për dëmshpërblim nuk është një nismë personale e lojtarit”, tha Wanda Nara, e tërbuar që situata me bashkëshortin e saj është ende e ndërlikuar.
