Serbia do të zhvillojë zgjedhje parlamentare dhe vendore të parakohëshme këtë pranverë, deklaroi kryeministri Aleksandar Vuçiç. Duke folur në një takim të këshillit të partisë në pushtet, Partia Progresiste e Serbisë të dielën, udhëheqësi i saj, kryeministri Aleksander Vuçiç tha se ka vendosur të thërrasë zgjedhje të parakohëshme parlamentare dhe vendore.
“Është vendimi im që ne të shkojmë në zgjedhje dhe ne do të dalim fitues nga zgjedhjet,” tha Vuçiç, duke folur para 500 delegatëve të partisë së tij.
Ai tha se dëshirone të sigurohej që vendi do të kishte qeverisje të qëndrueshme dhe se drejtimi aktual politik i vendit do të vijojë – përfshirë përpjekjet e tij për anëtarësim në Bashkimin Europian.
“Unë nuk dua të vë në rrezik të ardhmen e Serbisë,” tha ai.
Data e zgjedhjeve nuk është përcaktuar ende, por zgjedhjet parlamentare ka gjasa do të mund të zhvillohen krahas zgjedhjeve për pushtetin vendor dhe rajonal (zgjedhjet për rajonin autonom të Vojvoditës) të cilat pritet të zhvillohen mes 22 prillit dhe 22 majit.
Debati nëse do të kishte apo jo zgjedhje të parakohëshme parlamentare ka vijuar prej kohës në median serbe.
Opozita pretendon se zgjedhjet janë të nevojshme për shkak se qeveria e udhëhequr nga Progresistët e ka shkatërruar vendin.
Gjithsesi vrojtimet e opinionit publik kanë sugjeruar se një votim i parakohshëm thjeshtë sa do të forcojë sundimin e partisë në pushtet.
Koalicioni i udhëhequr nga Partia Progresiste e Serbisë fitoi 158 nga 250 vendet në parlament në zgjedhjet e fundit të zhvilluara në mars 2014 dhe krijoi një qeveri me parti të tjera.
Një vrojtim i kryer në tetor 2015 nga Ipsos Strategic Marketing sugjeroi se Partia Progresiste mund të fitojë 45.8 për qind të votave në rast se zgjedhjet zhvilloheshin në atë kohë.
Partia Socialiste do të fitonte 10.4 për qind, Partia Demokratike 9.3 dhe Partia Radikale Serbe 5.8 për qind, sipas vrojtimit.
