Luftë të re paralajmëroi kryeministri i Kosovës, Ramush Haradinaj, nëse synohet ndarja e Kosovës.Ai madje mundësinë për ndarjen e vendit i cilësoi si tallje.
“Këto janë hajgare (tallje), njerëzit mund të flasin çka donë, ndarja është luftë e re në Ballkan. Kush është gati edhe për një luftë të re, le të flet për kufi, për ndarje”, është përgjigjur shkurt Haradinaj në një intervistë mbrëmë. Por ndaj këtyre deklaratave ka reaguar presidenti serb, Aleksandar Vuçic, transmeton lajmi.net.
Vuçiç është “zbutur” duke deklaruar se Serbia nuk është e interesuar për luftë. “Mua nuk më pëlqen kur udhëheqësit e vendeve të tjera flasin për luftë.
Ne nuk duam luftë, dhe do të japim më të mirën që ta mbrojmë tokën tonë nga ndonjë konflikt”, deklaroi presidenti serb. Vuçiç këto deklarime i dha pikërisht në ditën kur pati një takim me presidentin e Francës, Emmanuel Macron.
Lideri francez në këtë takim ka kërkuar nga Vuçiçi arritjen e një marrëveshje përfundimtare me Kosovën, duke e cilësuar këtë si shumë të rëndësishme në rrugën e Serbisë drejt BE-së.
Vuçiq tutje deklaroi se do të mundohet që të mos e lë për gjeneratat e tjera një konflikt të hapur.
“Nëse ka një konflikt të ngrirë me Kosovën, llogaritni se nuk ka perspektivë evropiane”, përfundoi Aleksandar Vuçiq. Presidenti i Kosovës dhe ai i Serbisë sot do të takohen në Bruksel për ta vazhduar fazën finale të dialogut. (b.an)
