Mosbindja civile në Serbi është bërë e përditshme. Studentët e Novi Sadit zhvilluan një marshim proteste duke bllokuar një kryqëzim të rëndësishëm të qytetit në kërkim të drejtësisë për tragjedinë e 1 nëntorit që u mori jetën 15 personave. Ata akuzojnë presidentin Aleksandër Vuçiç dhe qeverinë e drejtuar nga kryeministri Millosh Vuçeviç për neglizhencë dhe lejimin e korrupsionit, teksa kërkojnë dorëheqjen e tyre.
Gjatë të mërkurës u mbajt një marshim në Beograd që përfundoi më dorëzimin e 1 mijë letrave identike në ndërtesën e Prokurorisë Publike, ku u kërkua seriozitet në procesin e drejtësisë për çështjen e rrëzimit të strehës së betonit në stacionin e trenave në Novi Sad, ku mbetën të vdekur 15 persona. Në të njëjtën kohë me bllokadën në Novi Sad që zgjati për 2 orë, edhe në qytete të tjera të Serbisë janë zhvilluar akte të mosbindjes civile duke bllokuar për të paktën 15 minuta akset kryesore të rrugëve. Sakaq, të dielën që kaloi në Serbi u mbajt protesta më e madhe ndonjëherë, me mbi 100 mijë njerëz nën drejtimin e studentëve dhe fermerëve u mblodhën në sheshin Slavija të Beogradit.
Pavarësisht protestave dhe kërkesave të drejtëpërdrejta, Vuçiç pretendon se drejtësia për rastin po bëhet me dosje voluminoze dhe largimin e një ministri. Presidenti i Serbisë pretendon se protestat studentore që kanë pushtuar vendin nuk janë spontane, por të mbështetura nga faktorë të jashtëm. Vuçiç njofton se do të shfaqë prova që vërtetojnë fjalët e tij, ndërsa përmendi arsyet kryesore që sipas tij fshihen pas manifestimeve: Për të përshpejtuar zgjidhjen e çështjes së Kosovës, për të penguar Serbinë të jetë lider rajonal, për shkak të qëndrimit të Serbisë në OKB kundër miratimit të Rezolutës për Srebrenicën.
