Kryeministri i Serbisë Aleksandër Vuçiq ka thënë se Serbia nuk do ta pranojë pavarësinë e Kosovës dhe këtë nga ai deri më tani askush nuk e ka kërkuar.
Ai ka thënë se do ta zgjidhë edhe rastin e vrasjes së vëllezërve Bytyqi.
“Nëse më pyetni nëse do ta pranojmë pavarësinë e Kosovës ose jo, ne nuk kemi një kërkesë të tillë nga askush dhe nuk mund ta them nëse do ta bëjmë këtë”, ka thënë Vuçiq duke u përgjigjur në pyetjet pas ligjëratës që ka mbajtur në Universitetin Jon Hopkins në Washington.
Ai ka përmendur edhe pesë shtetet e BE-së që nuk e kanë pranuar pavarësinë e Kosovës.
Vuçiq ka thënë se deri më tani është arritur mjaft në dialogun me Prishtinën sepse përfaqësuesit e dy palëve kanë biseduar për të gjitha çështjet si dhe për rritjen ekonomike në mes dy vende.
Në pyetjen deri ku ka arritur të zgjidhet rasti i vrasjes së vëllezërve Bytyqi, Vuçiq ka thënë se Serbia do ta zgjedhë atë rast sepse kjo është punë dhe detyrë, shpejt ose shumë më shpejt se sa pritet.
“Për dallim nga të tjerët që iu ikin t’i zgjedhin këto çështje mund t’iu them se ne do ta kryejmë detyrën dhe do të mbrojmë drejtësinë”, tha Vuçiq, përcjell Kosovapress.
Ai ka thënë se vrasja e vëllezërve Bytyqi ka qenë një krim i rëndë dhe se Serbia do ta kryejë punën e vet, jo vetëm pse kjo është një çështje kyçe në marrëdhëniet mes Serbisë dhe SHBA, por se kjo do të ishte zgjedhje shumë e mirë.
Ekspres
