Numri dy i grupit “Shteti Islam” (ISIS) është vrarë gjatë një bombardimi ajror amerikan afër Mosulit, në Irak.
Fadhil Ahmad al-Hayali, i njohur edhe me emrin Hajji Mutaz, është vrarë teksa gjendej në një veturë me një zyrtar tjetër të organizatës xhihadiste. Sipas mediave ai ishte një prej koordinatorëve kryesorë të transferimit të armëve, eksplozivit, automjeteve dhe të njerëzve ndërmjet Irakut dhe Sirisë. “Vdekja e tij do të ketë një impakt real në operacionet e ISIS-it, duke e ditur influencën e tij në financat, medie, operacionet dhe logjistikën e ISIS-it”, ka theksuar Ned Price, zëdhënës i Këshillit të Sigurisë Kombëtare.
Megjithatë, kjo nuk është hera e parë që njoftohet për vrasjen e tij. Në dhjetor, zyrtarë amerikanë të Mbrojtjes në kushte anonimiteti u kishin thënë gazetarëve se ai ishte pjesë e një grupi zyrtarësh të lartë të organizatës që janë vrarë gjatë një bombardimi të koalicionit ndërkombëtar.
