Krimi i ndodhur në vitin 1997, kur u vra brenda shtëpisë së saj Drita Shaba, nga i dashuri i nuses së djalit, pasi zbuloi tradhtinë e tyre u pasua me një tjetër ngjarje në vitin 2007, shkruan “Panorama”. Lufti Shaba, babai i Xhurianit, djalit që vrau vjehrrën e të dashurës së tij, u qëllua për vdekje pasi mbylli minimarketin që kishte në pronësi, në Rrugën e Elbasanit, në Tiranë.
Në atë kohë, Policia ngriti disa pista dyshimi, mes tyre dhe atë të krimit për shkak të hakmarrjes për ngjarjen ku ishte i biri protagonist shkruan Panorama.
Që nga momenti i krimit të Drita Shabës, edhe pse Policia e zbardhi ngjarjen në vitin 2004, Xhurian Shaba u zhduk pa lënë gjurmë. Nga ana e babait të tij u deklarua se i biri ishte vrarë nga ana e nipit të tij, Afrim Shabës, pas ekzekutimit të së ëmës.
Këto dyshime nuk u vërtetuan dot, madje nga ana e Policisë në atë kohë deklarohej se babai e kishte sajuar historinë e vdekjes së të birit, me qëllim që ai t’i shmangej drejtësisë.
Deri tani, Policia e cilëson person në kërkim Xhurian Shabën, pasi nuk ka të dhëna të sakta nëse ai është vrarë apo është fshehur nga frika e arrestimit dhe vënies para përgjegjësisë për krimin.
Më 2 nëntor të vitit 2007, një person i armatosur dhe i maskuar i doli para Lufti Shabës dhe bashkëshortes së tij, duke e qëlluar për vdekje 63-vjeçarin, i njohur dikur dhe si trajner i çiklizmit.
Për shkak të punës si tregtar dhe të kaluarës së tij, Policia ngriti disa pista, njëra prej të cilave ishte dhe hakmarrja, por ende sot nuk dihet se kush ka qëlluar mbi Lufti Shabën dhe pse./a.m.
