Gjykata e Shkallës së Parë në Shkodër, ka dënuar me 35 vjet burg Aleksandër Dushajn, i akuzuar për vrasjen e dy vëllezërve Skënder dhe Abdullah Shkambi, më 2 janar të këtij viti, në fshatin Postribë.
Dushaj ka shfaqur pendesë përpara trupit gjykues, por gjykata e shpalli fajtor për veprat penale “Vrasje me paramendim në rrethana cilësuese” dhe “armëmbajtje pa leje”, por në aplikim të gjykimit të shkurtuar dënimi u ul një 1/3 dhe përfundimisht u dënua me 35 vjet.
Gjykatësja Luveda Dardha lexoi verdiktin dhe u shpreh se Dushaj duhet ta vuajë dënimin në një burg të sigurisë së lartë.
“I pandehuri Aleksandër Dushaj dënohet me burgim të përjetshëm, por në zbatim të nenin 406 të Kodit të Procedurës Penale, të pandehurit Aleksandër Dushaj, i ulet një e treta e dënimit, duke e dënuar përfundimisht me 35 vite burg. Vuajtja e dënimit për të pandehurin fillon nga data e ndalimit, datë 5 janar 2016 në një burg të sigurisë së lartë”, tha ajo.
Palët ndaj këtij vendimi mund të ankimojnë brenda 10 ditësh në gjykatën e apelit në Shkodër.
Vrasja që tronditi Shqipërinë në fillim të këtij viti, ndodhi për shkak se Aleksandër Dushajt iu mohua pranimi i krushqisë, pasi kërkonte dorën e vajzës së Skënder Shkambit. (java /r.a)
