Prokuroria për Krime të Rënda kërkon dënimin me 30 vjet burgim për shtetasin Doksan Dushku, i akuzuar për “vrasje për shkak të marrëdhënieve familjare”. Kjo pasi më datë 28.05.2014, në fshatin Sllatinë të Dibrës, ka vrarë me armë zjarri vajzën e tij, Fatmira Dushku, pasi kjo e fundit ishte shtatëzënë dhe e pamartuar, gjë e cila nuk pranohej nga familja e saj.
Pas krimit, autori e ka pranuar krimin dhe për këtë arsye, nga gjykata u vendos gjykimi me procedurë të përshpejtur. Në bazë të gjykimit të shkurtuar, i pandehuri përfiton uljen me 1/3 e dënimit.
Gjithashtu, Prokuroria kërkoi dënimin me 1 vit burg për shtetasin Lulzim Dushku (djali i autorit), i akuzuar për “veprime që pengojnë zbulimin e së vërtetës”. Edhe ndaj këtij shtetasi, aplikohet ulja me 1/3 e dënimit për shkak të gjykimit të shkurtuar.
