Krimi në familje mori një tjetër jetë ditën e djeshme. Ishte , 65-vjeçari Arqile Fili i cili vrau bashkëshorten Antigoni Fili 60 vjeç me mjetin prerës kosore, në qytetin e Fierit. Përpara hetuesve ai ka treguar se nuk donta ta vriste gruan, por u grindën pasi ajo nuk po i jepte para për të blerë alkool.
“U grindëm pasi i kërkova para për të blerë pije alkoolike, por nuk desha ta vrisja”. është shprehur ai
Krimi në familje ndodhi gjatë ditës së enjte në lagjen “15 tetori” në Fier, por u zbulua të premten nga vajza e familjes Fili. 65-vjeçari ka mbajtur për më shumë se 24 orë kufomën e bashkëshortes së tij në banesë.
Vajza e tyre, e cila jeton në Tiranë ka shkuar për vizitë tek prindërit, por babai nuk i ka hapur derën e shtëpisë.
Kjo ka detyruar të renë që të lajmërojë policinë e Fierit. Rreth orës 18:00 të së premtes, efektivët kanë ndërhyrë dhe kanë gjetur të shtrirë në kuzhinë trupin e pa jetë të 60-vjeçares. Pranë saj, policia gjeti dhe sekuestroi armën me të cilën është vrarë e moshuara, një kosore. Antigoni Fili dyshohet se ka humbur jetën prej mbrëmjes së djeshme.
Pas ardhjes së efektivëve 65-vjeçari ka tentuar të largohet nga banesa, por është arrestuar. I moshuari ishte konsumues i rregullt i alkoolit si dhe prej kohësh vuante nga depresioni.
