Ka pranuar se ka vrarë bashkëjetuesen e tij Agim Ajdinaj, shqiptari 51-vjeçar i arrestuar mbrëmjen e 5 janarit me akuzën për vrasjen e partneres së tij Khadija Bencheickh, 46-vjeçares marokene, trupi i së cilës ishte bërë copë-copë dhe u gjet në një fushë në Valeggio sul Mincio (Verona).
Burri e ka justifikuar vrasjen me një situatë mes tyre që ishte bërë e paqëndrueshme prej disa kohësh, e lidhur me mosmarrëveshjet e përditshme për arsye të kota. “Po e bëra unë”, ka thënë Ajdinaj para prokurores dhe hetuesve shkruan BW.
Gjatë marrjes në pyetje në burgun veronez të Montorios para prokurores Paola Vacca, vrasësi ka përjashtuar nipin 27-vjeçar Lisand Ruzhdija që ishte arrestuar bashkë me të, me akuzën se e kishte ndihmuar për të shkatërruar kufomën e gruas.
51-vjeçari është mbajtur në burg, ndërsa nipi i tij është lënë i lirë. Ndërkohë karabinierët janë duke zhvilluar ende hetime në apartamentin ku jetonte Ajdinaj dhe viktima në kërkim të gjurmëve të gjakur në shtëpi dhe në garazh për të rindërtuar pasazhet kyçe të krimit dhe gjymtimit të mëtejshëm të trupit. Gruaja mendohet se është vrarë natën e 29 dhjetorit, ndoshta ndërsa ishte duke fjetur./a.m.
