Efektivi i Forcave Shqiponjave që ekzekutoi 25-vjeçarin Klodian Rasha është arrestuar nga Policia e Shtetit. N.H., u prangos disa orë pas ngjarjes, ndërsa burime për Dosja.al bëjnë me dije se ai akuzohet nga prokuroria për vrasje në kushtet e kapërcimit të mbrojtjes së nevojshme.
Prokuroria e Tiranës që mori në dorë hetimin e ngjarjes përjashtoi më herët nga hetimi drejtorinë e Policisë Tiranë, për konflikt interesi, duke qenë se polici ishte pjesë e njësisë Shqiponja, që është nën varësinë e Drejtorisë Tiranë.
Vrasja ndodhi në orën 01:45 pas mesnate. Polici ishte duke patrulluar në Laprakë, kur ka pikasur të riun i cili ishte duke lëvizur përtej afatit të lejuar nga autoritetet. I riu nuk ka pranuar që të ndalojë në moment që patrulla i ka kërkuar të ndalojë për verifikim dhe sipas dëshmisë së policit është larguar dhe i riu ka vrapuar.
Polici e ka ndjekur të riun, derisa ky i fundit i ka nxjerrë armën. Në këtë moment polici e ka qëlluar duke e plagosur me dy plumba, një në kokë dhe një në shpatull nga mbrapa. Klodian Rasha ka ndërruar jetë në spital ndërsa familja mohoi ekzistencën e një arme në dorën e tij./a.p
