Policia e Shtetit është angazhuar maksimalisht me të gjitha kapacitetet e saj për të kapur autorët e ngjarjes tragjike të mbrëmjes së djeshme në Elbasan dhe për këtë kërkohet dhe bashkëpunimi me qytetarët.
Sipas njoftimit të Policisë së Shtetit, efektivët e rendit dhe sigurise janë angazhuar maksimalisht për për të zbardhur ngjarjen e ndodhur në mbrëmjen e datës 03.02.2016 në një lokal në Krastë të Elbasanit. Per kete, Policia e Shtetit kërkon bashkëpunimin e komunitetit për të bërë të mundur zbardhjen sa më të shpejtë të kësaj ngjarje të rëndë kriminale. Policia e Shtetit vë në dispozicion 3.000.000 ( tre milion ) lekë për çdo informacion të vlefshëm që çon në zbardhjen e ngjarjes dhe identifikimin e autorëve. Sigurojmë anonimatin për çdo shtetas që do japë info të saktë në numrat e celular: 0694100353 dhe ne numrin pa pagesë 129, thekson Policia.
Policia vijon kontrollet në të gjithë zonat për rreth Elbasanit për kapjen e personave, të cilët qëlluan me armë në drejtim të lokalit, ku humbën jetën tre persona e mbetën të plagosur 8 të tjerë.
Sipas Policisë, gjatë gjithë natës Forcat Renea, FNSH e Policia e Elbasanit, kanë ushtruar dhjetëra kontrolle në banesa në Elbasan, Peqin, Cerrik, Librazhd e Gramsh. Gjithashtu, janë kontrolluar në akset rrugore e në qytete automjete të dyshuara, ku mund të lëviznin autoret. Janë krehur me këmbë zona kodrinore e fushore ku dyshohej se mund të fshiheshin autorët, apo mund të kishin braktisur makinën, si dhe janë kontrolluar mbi 150 garazhe makinash në hyrje të pallateve.
Sipas Policisë, janë shoqëruar për verifikim 46 shtetas.Ndërkohë, grupi hetimor ka sekuestruar në vendin e ngjarjes 2 armë zjarri automatik, që dyshohet se i kanë lënë në vendngjarje autorët e krimit, dy krehër pa fishekë dhe një krehër me 26 fishekë si dhe 65 gëzhoja. Një grup specialistësh të Krimeve të Rënda në Drejtorinë e Policisë së Shtetit, të kryesuar nga Drejtori i Krimeve të Rënda në bashkëpunim me specialistët për Krimet e Rënda në Drejtorinë e Policisë Elbasan si dhe me Prokurorinë e rrethit Gjyqësor Elbasan, po vijojnë punën për zbardhjen e ngjarjes.
Mbrëmë rreth orës 23:00, ka mbërritur ministri i Brendshëm, Saimir Tahiri, në Drejtorinë Vendore të Policisë në Elbasan, i shoqëruar nga Drejtori i Policisë së Shtetit, Haki Çako. Mbrëmjen e djeshme ka shkuar ne spital ministri i Shëndetësisë, Ilir Beqaj, për të ndjekur nga afër situatën.
Nga ngjarja kanë humbur jetën: Agron Capja, Ardit Sinakoli, Eno Bedalli dhe jane plagosur tete te tjere.
