Dhjetëra dosje të vrasjeve pa autor në Tropojë pas viteve 1997 pritet të rihapen, ndërkohë që SPAK, ka në hetim vrasjet e katër vëllezërve të familjes Haklaj, pas denoncimit ndaj Sali Berishës nga motra e madhe e tyre, Aishe Haklaj që dëshmoi në prill të këtij viti.
Të ftuar në “Studio Live” në Report Tv me gazetarin Arbër Hitaj për të folur për këto dosje kanë qenë Arben Meçe, analist dhe Idajet Beqiri, avokat.
Arben Meçe: “Në 97-98 ka dy elementë. Lufta politike. Gjithçka fillon nga një miting ku Haklajt kundërshtojnë, bëjnë një debat për një miting të Berishës. Më pas kërkesa e Berishës për të kapur birin e Haklajve që prishi mitingun. 98 është një nga momentet më të rëndësishme në historinë e Tropojës sepse 98 ekspozoi Tropojën si frontin e parë.
Në 98 një strukturë e armatosur po rikonstruktohej në Kosovë dhe më pas FARK-u në Shqipëri. Ishte paralele. FARK-u tentoi të futej në Kosovë përmes Tropojës. Ishte strategji për të futur në konflikt të armatosur dy struktura të armatosura që ishin të organizuara mirë. Haklajt i bënë bllok FARK-ut dhe e çarmatosi. FARK-u u çarmatos nga Haklajt. Kjo asgjësoi një nga skemat më makabre të zhvillimeve post çlirim në Kosovë. Ishte policia sekrete serbe por s’ka qenë vetëm ajo. Ka pasur dhe faktorë shqiptarë. Armiku numër 1 i Haklajve ka qenë Sali Berisha.
Beteja është më shumë se politike. Ata shmangën luftën civile në Kosovë. Me këtë akt Haklajt u shpallën armiq nga Serbia. Fatmir Haklaj është goditur dy herë nëpërmjet skemave të panjohura në Shqipëri dhe nëpërmjet një armatimi që vinin nga korridoret serbe.”/m.j
