Persona ende të paidentifikuar kanë qëlluar për vdekje një 36-vjeçar, në Vlorë, mbrëmjen e së mërkurës.
Ngjarja në fjalë ka ndodhur rreth orës 21:40 në lagjen “Rilindja”, ku viktimë ka mbetur Andrea Billa, 36 vjeç, i njohur gjithashtu dhe me emrin Agim Meli.
Nga të dhënat e para, mësohet se viktima sapo ishte kthyer nga Spanja, ku jetonte prej vitesh dhe në momentin e vrasjes, ka qenë duke shkuar në banesën e motrës së tij.
Nga këqyrja e vendit të ngjarjes, ka dyshime se ai është qëlluar nga afër pasi 2 nga 4 plumbat që janë qëlluar mbi të, i ka marrë në kokë.
Nga ana e saj, Policia e Vlorës ka ngritur menjëherë pika kontrolli të shumta në të gjitha akset kryesore të qytetit dhe është duke punuar për zbardhjen e shkaqeve të ngjarjes dhe identifikimin e autorëve.
