Tre ditë pas vrasjes së trefishtë të ndodhur në Thumanë, policia njoftoi se dy pre autorëve të dyshuar në këtë vrasje janë vetëdorëzuar. Burime nga policia pohojnë se njëri prej autorëve, Besnik Kora, është dorëzuar në Komisariatin e Rrëshenit, ndërsa tjetri, Daniel Kora, në Lezhë.
Sipas policisë gjithashtu janë arrestuar dhe 4 persona të akuzuar për dhënie ndihme dhe përkrahje të autorëve të krimit.
Emrat e tyre sipas policisë janë: Paris Gjeta, 22 vjeç, Ardian Gjonaj, 36 vjeç, Preng Gjeta, 54 vjeç dhe Shpëtim Nikolla, 44 vjeç.
Sipas policisë, mbi ta rëndon akuza e “Përkrahjes së autorit të krimit dhe veprime që mbulojnë zbulimin e së vërtetës”.
Më herët, Gurali Kora, 56 vjeç, ka rënë në prangat e Policisë si i dyshuari kryesor bashkë me tre djemtë e tij për tri vrasjet.
Para hetuesve të çështjes ai ka thënë se ka qenë ai autori i krimit të trefishtë në fshatin Thumanë të Krujës, duke përjashtuar tre djemtë e tij. Pas arrestimit të 56 vjeçarit dhe vetëdorëzimit të dy fëmijëve të tij, Besnik dhe Daniel Kora, policia vijon kërkimet për kapjen e vëllain e tyre, Pëllumb Kora.
