David Myrte, 25-vjeçari i arrestuar për vrasjen e Zarif Alliut, ngjarje e ndodhur para 5 ditësh në Devoll, ka mohuar akuzat duke hedhur poshtë pretendimet e prokurorisë. Nga salla e gjyqit, ku ndaj tij u caktua dhe masa e sigurisë ‘Arrest me burg’ Myrte pohoi se personi që e ka akuzuar, është i sëmurë.
“Nuk kam lidhje me këtë ngjarje. Personi që me identifikon mua, ka qenë në ‘lajthitje’, e bën në mënyrë të gabuar. Nuk jam unë autori dhe nuk asnjë dijeni për ngjarjen. Kam qenë i shoqëruar me shokët e mi të cilët janë të gatshëm ta vërtetojnë ketë,por policia nuk ka pranuar t’i marrë dëshminë.”, theksoi i riu para togave të zeza, raporton për ‘BalkanWeb’ gazetarja Lediona Xheladinaj.
Ndërkohë, sipas hetimeve të prokurorisë ngjarja ka ndodhur për çështje droge, pasi autori i vrasjes i kishte viktimës Alliu 12 mijë euro borxh për transportin e drogës nga kufiri i gjelbër. Po kështu në dosje rezulton se personi që i ka bërë pritë Alliut ishte nga Shqipëria e Mesme ose nga veriu i vendit. Por mësohet se autori nuk ka vepruar i vetëm. Një nga dëshmitarët e ngjarjes ka identifikuar një prej personave që morën pjesë në krim, i cili është shtetasi David Myrte, 25 vjeç i dënuar më parë në Greqi për trafik droge.
a.ç
