Dy ditë pas arrestimet të tij, pronari i lokalit në ish bllok ku ndodhi vrasja në 4 tetor, është liruar nga gjykata e Tiranës.
Gjykate vendosi ‘arrest shtëpie’ për Redi Popeskun, në seancën që u zhvillua me dyer të mbyllura dhe pa praninë e mediave. Redi Popesku u arrestua dy ditë më parë pasi ka dyshime të forta se po pengon autoritetet për të hedhur dritë mbi ngjarjen e rëndë në lokalin e tij.
Burime nga Prokuroria thanë Popesku, që është edhe një nga dëshmitarët kyç në ngjarje, ka refuzuar në mënyrë të përsëritur kërkesën për të dorëzuar një pistoletë të cilën e disponon me leje.
Ndaj Popeskut, është ngritur akuza e kryerjes së veprimeve që pengojnë zbulimin e së vërtetës.
Njoftimi i policise për arrestimin e Popeskut:
Arrestohet një tjetër shtetas në lidhje me ngjarjen e ndodhur në një lokal në mbrëmjen e 04.10.2018 ku mbeti i vrarë me armë zjarri shtetasi F. G., dhe u plagosën shtetasit E. H., dhe E. M.
Specialistët për Hetimin e Krimeve të Rënda ndaj Jetës dhe Pronës arrestuan për veprën penale “Veprime që pengojnë zbulimin e të vërtetës”, shtetasin:
– Redi Popescu, 40 vjeç, banues në Tiranë.
Materialet iu referuan Prokurorisë së Rrethit Gjyqësor Tiranë në ngarkim të shtetasit të lartpërmendur për veprën penale “Veprime që pengojnë zbulimin e së vërtetës”, parashikuar nga neni 301 i Kodit Penal.
Javanews/a.ç
