Policia e Shtetit ka dhënë njoftimin zyrtar lidhur me veprimet për kapjen e autorit të vrasjes së 32-vjeçarit Endri Mustafa.
Është shpallur në kërkim 28-vjeçari Ibrahim Lici, i cili gjithashtu akuzohet për vrasjen e dy vëllezërve Astrit dhe Brahim Bilali.
Por në pranga ka përfunduar bashkëpunëtori i tij, një i mitur vetëm 15 vjeç që dyshohet se ka ndihmuar Licin për vrasjen e Mustafës.
I mituri është identifikuar si Ergys Malja, ndërsa përveç të miturit ka një tjetër të arrestuar. Në cilësinë e personit që ka dijeni për ngjarjen, prangat i janë vendosur dhe Edison Arazit.
Ibrahim Liçi është emër i njohur për policinë, pasi rezulton i përfshirë edhe në ekzekutimin e dy vëllezërve Astrit dhe Brahim Bilali në Shkodër, ngjarje e ndodhur në vitin 2019, për të cilën 28-vjeçari u shpall në kërkim si autorë i krimit.
Njoftimi nga policia e Shkodrës:
Zbardhet dhe dokumentohet ngjarja e ndodhur më datë 15.05.2021, në lagjen Guerrile, Shkodër, ku u gjet i vrarë me armë zjarri shtetasi E. M.
Shpallet në kërkim autori kryesor i dyshuar për vrasjen e 32-vjeçarit.
Arrestohet në flagrancë bashkëpunëtori i autorit kryesor të dyshuar për vrasjen, si dhe vihet në pranga edhe një shtetas tjetër që dyshohet se ka dijeni për ngjarjen.
Në vijim të veprime të kryera nga grupi i posaçëm hetimor, i përbërë nga specialistët të Hetimit të DVP Shkodër dhe të Drejtorisë Kundër Krimeve ndaj Personit dhe Pronës në Departamentin e Policisë Kriminale në Policinë e Shtetit, nën drejtimin e Prokurorisë së Rrethit Gjyqësor Shkodër, në bazë të provave të grumbulluara u bë shpallja në kërkim e shtetasit I. L., 28 vjeç banues në lagjen Guerrile, Shkodër, i dyshuar si autor i vrasjes së shtetasit E. M.
Gjithashtu, në lidhje me këtë ngjarje është arrestuar shtetasi i mitur E. M., 15 vjeç i cili dyshohet se në bashkëpunim me shtetasin e lartpërmendur kanë vrarë me armë zjarri shtetasin E. M.
Po gjatë veprimeve hetimore dhe si rezultat i kontrolleve të ushtruara për kapjen e autorit u arrestua në flagrancë edhe shtetasi Edison Arazi, 26 vjeç banues ne lagjen “Salo Halili”, Shkodër, i cili dyshohet se ka dijeni për ngjarjen. Gjatë kontrollit në banesën e tij është gjetur një sasi lënde narkotike cannabis sativa.
Materialet iu referuan Prokurorisë se Rrethit Gjyqësor Shkodër, për veprat penale “Vrasja me paramendim” kryer në bashkëpunim dhe “Armëmbajtja pa leje” në ngarkim të shtetasit I. L., në ngarkim të shtetasit E. M. për veprën penale “Vrasja me paramendim” kryer në bashkëpunim, si dhe në ngarkim të shtetasit E. A. për veprën penale “Prodhimi dhe shitja e narkotikëve”.
Kujtojmë se Endri Mustafa ishte pjesë e grupit të Astmer Bilalit në Shkodër, i cili prej kohësh ishte në konflikt me familjen e famshme të kryeqendrës së veriut, Liçajt.
g.kosovari
