Trupi i pajetë i të riut Xhuliano Bullaru u gjet i vrarë me armë zjarri brenda makinës së tij pranë fshatit Babicë në Vlorë mëngjesin e së shtunës. Ndërsa krimi dyshohet se ka ndodhur mbrëmjen e së premtes.
Për nga mënyra se si është gjetur trupi i pajetë dhe pozicioni i plumbave që e kanë goditur në kokë, Bullari dyshohet të jetë vrarë nga pasagjeri që ndodhej brenda makinës, identiteti i të cilit nuk dihet ende.
Mësohet se ai është qëlluar me të paktën dy plumba në pjesën e kokës, që kanë qenë fatale për të.
Policia e Vlorës ka shoqëruar më shumë se 10 persona në komisariat për t’u marrë në pyetje lidhur me ngjarjen e rëndë, por ende nuk ka asnjë të arrestuar.
Burime nga Policia bëjnë me dije se i riu dyshohet të ketë qenë i shoqëruar me persona të njohur dhe se dyshohet që ai mund të jetë nxjerrë në pritë ku edhe është ekzekutuar.
Ndaj 25-vjeçarit dyshohet të jetë qëlluar me tre plumba pistolete, dy prej të cilëve kanë qenë fatalë për të. Përveç personave të shoqëruar që janë marrë në pyetje, në komisariat janë shoqëruar edhe familjarë të 25-vjeçarit. Policia lokale po heton për të mësuar më shumë rreth lëvizjeve të Bullarit gjatë ditëve të fundit drejt Vlorës dhe me personat që është shoqëruar.
Gjithashtu, hetuesit kanë marrë në pyetje edhe persona të zonës ku u gjet i vrarë 25-vjeçari, nëse kanë dëgjuar krisma apo nëse kanë parë lëvizje. Deri më tani mbetet e paqartë për Policinë arsyet e ngjarjes së rëndë. Mësohet se 25-vjeçari siç ka konfirmuar babai i tij, do të shkonte drejt Gjermanisë.
Babai: Doli për kafe, s’dinim të kishte konflikte
Babai i 25-vjeçarit është shprehur se i biri është larguar nga shtëpia në Babrru të Tiranës rreth orës 18:00 të pasdites së të premtes, si zakonisht për të pirë kafe. “Nuk dinim të kishte konflikte, priste të ikte në Gjermani tek i vëllai, pasi donte të largohej nga Shqipëria.
Më herët ka bërë 2.5 vite burg për dhënie ndihme në kalim të paligjshëm të kufirit. Pasi ishte arrestuar në Fier. Nuk kishte asgjë që ta lidhte me Vlorën”, është shprehur ai.
Viktima është identifikuar nga nëna e tij në morgun e qytetit, ndërsa babai e mori vesh lajmin gjatë transmetimit live televiziv pranë Policisë së Vlorës.
***
I riu Xhuljano Bullari u gjet i vrarë me armë zjarri mëngjesin e së shtunës brenda automjetit të tij, tip “Fiat” me targa të Tiranës. Trupi i pajetë u pikas nga qytetarë të rastit pranë fshatit Babicë, brenda një mjeti tip “Fiat Punto”. Hetuesit dyshojnë se 25-vjeçari ka arritur aty i shoqëruar nga persona të njohur. Po ashtu, ekspertiza mjekoligjore beson se 25-vjeçari ka ndërruar jetë rreth orës 21:00 të mbrëmjes së të premtes.
“Më datë 21.08.2021, rreth orës 07:35, në aksin rrugor Vlorë-Babicë, në rrethanave ende të paqarta, është gjetur pa shenja jete brenda në automjet, një shtetas ende i paidentifikuar, rreth 25 vjeç, dyshohet se ka humbur jetën nga përdorimi i armës së zjarrit. Shërbimet e Policisë kanë mbërritur menjëherë në vendngjarje”, sqaroi Policia e Vlorës. Grupi hetimor nën drejtimin e Prokurorisë po vijojnë punën për zbardhjen e plotë të rrethanave të ngjarjes.
Viktima 25-vjeçar është me origjinë nga Elbasani, por banues në zonën e Babrrusë në Tiranë, ndërsa ishte person me precedent penalë. Xhuljani Bullari kishte pak kohë që kishte dalë nga burgu, pasi ishte arrestuar për kalim të paligjshëm të kufirit të emigrantëve nga Siria.
I riu rezulton i dënuar me vite e 4 muaj burgim për akuzën e “Dhënies ndihmë për kalim të paligjshëm të kufirit, të shtetasve sirianë. Mikel Hoxha 25-vjeç dhe Xhuljan Bullari, 22 vjeç, janë kapur duke transportuar 7 shtetas sirianë. Ai u arrestua më 30 maj të vitit 2018 nga Policia e Fierit bashkë me një 25- vjeçar i quajtur Mikel Hoxha, banues në Tiranë, të cilët transportonin emigrantë sirianë nga dy makina të ndryshme.
“Arrestimi i këtij shtetasi u bë pasi në lagjen ‘Sheq i Madh’ Fier, është kapur me automjetin e tij tip ‘Lancia’ duke transportuar 3 shtetas Sirianë, të cilët kanë hyrë në kufirin e Republikës së Shqipërisë në mënyrë të paligjshme”, sqaronte Policia në atë kohë në lidhje me arrestimin e Xhuljano Bullarit.
Më herët, Bullari rezulton i dënuar edhe për akuzën e largimit nga “arresti shtëpiak”, e vendosur nga Gjykata.
/a.r
